સંયુક્ત આરબ અમીરાત (UAE)ની માંગ પર પાકિસ્તાને તેની 3.5 અબજ યુએસ ડોલરની લોન ચૂકવવાનો નિર્ણય લીધો છે. આ નિર્ણય એવા સમયે લેવામાં આવ્યો છે જ્યારે મધ્ય પૂર્વમાં ચાલી રહેલા યુદ્ધને કારણે UAE તેના ભંડોળ પરત કરવાની માંગ કરી રહ્યું છે. UAEએ આ ફંડ પાકિસ્તાનને તેના ‘બેલેન્સ ઓફ પેમેન્ટ્સ’ જાળવવા માટે આપ્યું હતું. તાજેતરમાં સુધી આ લોન UAE દ્વારા ‘રોલ ઓવર’ કરવામાં આવી રહી હતી. તેનો અર્થ એ કે UAE વારંવાર લોનની ચુકવણીની મુદત લંબાવી રહ્યું હતું.
શુક્રવારે એક મીડિયા રિપોર્ટ અનુસાર, યુએઈએ ઈરાન પર યુએસ-ઈઝરાયેલ યુદ્ધ બાદ મધ્ય પૂર્વમાં ઉભી થયેલી પરિસ્થિતિને ધ્યાનમાં રાખીને આ ફંડને તાત્કાલિક પરત કરવાની માંગ કરી છે. હવે પાકિસ્તાને આ મહિને UAEને તેની 3.5 બિલિયન ડોલરની સંપૂર્ણ લોન ચૂકવવાનો નિર્ણય કર્યો છે.
આ રકમ ક્યાં રાખવામાં આવી હતી
‘જિયો ન્યૂઝ’ એ સૂત્રોને ટાંકીને જણાવ્યું હતું કે આ મોટી રકમ સ્ટેટ બેંક ઑફ પાકિસ્તાન (SBP)માં ‘સેફ ડિપોઝિટ’ તરીકે રાખવામાં આવી હતી. પાકિસ્તાન આ મહિનાના અંત સુધીમાં અબુ ધાબીને યુએસ $3.5 બિલિયનની આ રકમ પરત કરશે.
આંતરિક સૂત્રોએ જણાવ્યું કે પાકિસ્તાન આ રકમ પર લગભગ 6 ટકા વ્યાજ ચૂકવી રહ્યું છે. અગાઉ, યુએઈ વાર્ષિક ધોરણે આ થાપણની રકમને રોલ ઓવર કરતું હતું. જો કે, ડિસેમ્બર 2025 માં, આ રકમ પહેલા એક મહિના માટે અને પછી 17 એપ્રિલ સુધી બે મહિના માટે વધારવામાં આવી હતી.
વર્તમાન નાણાકીય વર્ષ માટે, પાકિસ્તાનને બાહ્ય થાપણો તરીકે આશરે US$12 બિલિયનના રોલઓવરની જરૂર છે. જેમાં સાઉદી અરેબિયાના $5 બિલિયન, ચીનના $4 બિલિયન અને UAE પાસે $3.5 બિલિયનનો સમાવેશ થાય છે.
