પાકિસ્તાન અને અફઘાનિસ્તાન વચ્ચેનો તણાવ હવે ‘ખુલ્લા યુદ્ધ’માં ફેરવાઈ ગયો છે. પાકિસ્તાનના રક્ષા મંત્રી ખ્વાજા મોહમ્મદ આસિફે શુક્રવારે એક્સ પોસ્ટમાં કહ્યું કે બંને દેશ હવે ‘ખુલ્લા યુદ્ધ’માં છે. તેણે કહ્યું કે હવે અમારી ધીરજનો અંત આવી ગયો છે. હવે અમારી વચ્ચે ખુલ્લું યુદ્ધ છે. છેલ્લા મહિનાઓથી ચાલી રહેલો સીમા વિવાદ હવે વધુ ઘેરો બન્યો છે. ઓક્ટોબરમાં સરહદી અથડામણમાં ડઝનબંધ સૈનિકો, નાગરિકો અને શંકાસ્પદ આતંકવાદીઓ માર્યા ગયા હતા. પાકિસ્તાનનો આરોપ છે કે અફઘાનિસ્તાનની તાલિબાન સરકાર ટીટીપી જેવા આતંકવાદી જૂથોને આશ્રય આપી રહી છે, જેઓ પાકિસ્તાનમાં હુમલાઓ કરી રહ્યા છે. આ ઉપરાંત પાકિસ્તાને અફઘાનિસ્તાન પર ભારત સાથે ગઠબંધન કરવાનો આરોપ પણ લગાવ્યો છે, જેના કારણે ઈસ્લામાબાદ નારાજ છે.
ઓક્ટોબરમાં કતારની મધ્યસ્થીમાં યુદ્ધવિરામ થયો હતો, પરંતુ બંને પક્ષો અવાર-નવાર ગોળીબાર કરતા રહે છે. નવેમ્બરમાં ઈસ્તાંબુલમાં યોજાયેલી શાંતિ મંત્રણા નિષ્ફળ ગઈ. ગુરુવારે રાત્રે, અફઘાનિસ્તાને પાકિસ્તાન પર સીમાપારથી હુમલો કર્યો, જે તે પાકિસ્તાનના રવિવારના હવાઈ હુમલાનો જવાબ હોવાનું કહી રહ્યું છે. આ હુમલાઓમાં અફઘાન સરહદી વિસ્તારોમાં પાકિસ્તાની હવાઈ હુમલાનો સમાવેશ થાય છે. તેના જવાબમાં પાકિસ્તાને શુક્રવારે સવારે કાબુલ, કંદહાર અને પક્તિયા પ્રાંતમાં હવાઈ હુમલા કર્યા હતા. પાકિસ્તાની અધિકારીઓ અને અફઘાન પ્રવક્તા ઝબીહુલ્લા મુજાહિદે હુમલાની પુષ્ટિ કરી છે. પાકિસ્તાને કહ્યું કે આ હુમલા અફઘાન સીમાપારથી થયેલા હુમલાનો બદલો છે.
અફઘાનિસ્તાન પર પાકિસ્તાનનો શું આરોપ છે?
રક્ષા મંત્રી આસિફે કહ્યું કે 2021માં નાટોની પીછેહઠ બાદ પાકિસ્તાનને આશા હતી કે તાલિબાન અફઘાનિસ્તાનમાં શાંતિ અને વિકાસ પર ધ્યાન કેન્દ્રિત કરશે, પરંતુ તેના બદલે અફઘાનિસ્તાનને ભારતની વસાહત બનાવી દેવામાં આવી છે. તેણે અફઘાનિસ્તાન પર આતંકવાદની નિકાસ કરવાનો આરોપ લગાવ્યો હતો. બંને પક્ષોએ અલગ-અલગ જાનહાનિનો દાવો કર્યો હતો. પાકિસ્તાને દાવો કર્યો હતો કે તેણે ડઝનેક અફઘાન સૈનિકોને માર્યા છે, જ્યારે અફઘાનિસ્તાને કહ્યું છે કે તેના હુમલાથી પાકિસ્તાની દળોને ભારે નુકસાન થયું છે. અફઘાનિસ્તાને કેટલાક પાકિસ્તાની સૈનિકોને પકડવાનો દાવો પણ કર્યો હતો, જેને પાકિસ્તાને ફગાવી દીધો હતો.
