‘પાકિસ્તાનનું તંત્ર પડી ભાંગ્યું’, ગૃહમંત્રી મોહસિન નકવીએ સ્વીકાર્યું સત્ય,…

ઈસ્લામાબાદ: પાકિસ્તાનના ગૃહમંત્રી મોહસિન નકવીએ દેશની વર્તમાન વ્યવસ્થાને લઈને મોટું નિવેદન આપ્યું છે. તેમણે કહ્યું કે પાકિસ્તાનની સિસ્ટમ સંપૂર્ણપણે નબળી પડી ગઈ છે અને જો તેમાં સુધારો નહીં કરવામાં આવે તો લોકોનો ગુસ્સો ભવિષ્યમાં મોટા આંદોલનનું સ્વરૂપ લઈ શકે છે.

એક કાર્યક્રમમાં બોલતા, નકવીએ ભારતમાં યુવાનોની આગેવાની હેઠળના CJP ચળવળનો ઉલ્લેખ કર્યો અને કહ્યું કે આવી ચળવળો હવે માત્ર એક દેશ સુધી મર્યાદિત નથી. યુવાનોનો અવાજ સમગ્ર દક્ષિણ એશિયાના રાજકારણને પ્રભાવિત કરી શકે છે.

મોહસીન નકવીએ પોતાના ભાષણમાં ભારતના સીજેપી આંદોલનની ચર્ચા કરતા કહ્યું કે આજે યુવાનો પરિવર્તન ઈચ્છે છે. તેઓ વધુ સારી વ્યવસ્થા, રોજગાર અને જરૂરી સુવિધાઓની માંગ કરી રહ્યા છે.

તેમણે કહ્યું કે યુવા શક્તિને અવગણી શકાય નહીં. જો સરકારો સમયસર લોકોની સમસ્યાઓને નહીં સમજે તો આવા આંદોલનો ઝડપથી વધી શકે છે.

પોતાના દેશની વહીવટી અને રાજનૈતિક વ્યવસ્થા પર સવાલો ઉઠાવતા પાકિસ્તાની ગૃહમંત્રીએ કહ્યું કે પાકિસ્તાન જે સિસ્ટમમાં ચાલી રહ્યું છે તે સિસ્ટમ હવે સંપૂર્ણ રીતે નબળી પડી ગઈ છે.

તેમણે કહ્યું કે જો આગામી 10 વર્ષ સુધી સ્થિતિ આવી જ રહેશે તો કોઈ મોટો બદલાવ નહીં આવે. નકવીએ કહ્યું કે લોકશાહી જરૂરી છે અને તેઓ પોતે લોકશાહીના સમર્થક છે, પરંતુ વ્યવસ્થામાં સુધારાની જરૂર છે.

નકવીએ પાકિસ્તાનના નેતાઓને ચેતવણી આપતા કહ્યું કે સમગ્ર વિસ્તારના યુવાનો હવે જૂની રાજનીતિથી આગળ વધીને પરિવર્તન ઈચ્છે છે.

તેમણે કહ્યું કે નેતાઓ ચૂંટણી સમયે મોટા પ્રમાણમાં પૈસા ખર્ચે છે, પરંતુ સામાન્ય લોકોને આર્થિક મજબૂતી અને સારું જીવન આપવામાં નિષ્ફળ જાય છે. રોજગાર, મોંઘવારી અને નાગરિક સુવિધાઓ જેવા મુદ્દાઓ પર ધ્યાન આપવું જરૂરી છે.

મોહસીન નકવીએ કહ્યું કે જો પાકિસ્તાનની વર્તમાન વ્યવસ્થામાં સુધારો નહીં કરવામાં આવે તો લોકોનો ગુસ્સો મોટા વિરોધનું સ્વરૂપ લઈ શકે છે.

પાડોશી દેશોમાં થઈ રહેલા યુવા આંદોલનોનું ઉદાહરણ આપતા તેમણે કહ્યું કે સરકારોએ સમય આવ્યે લોકોનો અવાજ સાંભળવો પડશે. અન્યથા એવી પરિસ્થિતિ ઊભી થઈ શકે છે જ્યાં પરિવર્તનની માંગને રોકવી મુશ્કેલ બની જશે.