PoK વિરોધ: પાકિસ્તાન અધિકૃત કાશ્મીર (PoK)માં છેલ્લા બે મહિનાથી ચાલી રહેલ વિરોધ પ્રદર્શન હવે પાકિસ્તાનના મોટા શહેરોમાં પહોંચી ગયો છે. રવિવારે, પ્રદર્શનકારીઓ રાજધાની ઇસ્લામાબાદ અને રાવલપિંડીના આર્મી હેડક્વાર્ટર શહેરની શેરીઓમાં ઉતરી આવ્યા હતા. જેના કારણે પાકિસ્તાનના વડાપ્રધાન શાહબાઝ શરીફ અને આર્મી ચીફ અસીમ મુનીર પર દબાણ વધી રહ્યું છે.
વિદ્યાર્થીઓએ રવિવારે સાંજે લગભગ 5 વાગ્યે રાવલપિંડી પ્રેસ ક્લબની બહાર પ્રદર્શનની જાહેરાત કરી હતી. તેમાં PoKના વિદ્યાર્થીઓ સહિત મોટી સંખ્યામાં વિદ્યાર્થીઓએ ભાગ લીધો હતો. પ્રદર્શનને રોકવા માટે પોલીસ પહેલેથી જ તૈનાત હતી, પરંતુ તેમ છતાં લોકો મોટી સંખ્યામાં એકઠા થયા હતા. પરિસ્થિતિને કાબૂમાં લેવા માટે પોલીસે ઘણા વિદ્યાર્થીઓની અટકાયત કરી હતી અને લાઠીચાર્જ પણ કર્યો હતો.
ઈસ્લામાબાદ અને કરાચીમાં પણ પ્રદર્શન
રાવલપિંડી ઉપરાંત ઈસ્લામાબાદ અને કરાચીમાં પણ લોકોએ વિરોધ પ્રદર્શન કર્યું હતું. વિરોધીઓએ ચૂંટણી પ્રક્રિયા પર પ્રશ્નો ઉઠાવ્યા હતા અને રાજકીય સુધારાની માંગ કરી હતી. આ દરમિયાન ઘણા વિદ્યાર્થી નેતાઓ અને દેખાવકારોની અટકાયત કરવામાં આવી હતી. અનેક જગ્યાએ વિરોધ પ્રદર્શનને કારણે તણાવ અને અરાજકતાનું વાતાવરણ જોવા મળ્યું હતું.
ચૂંટણી વચ્ચે વિવાદ વધ્યો
આ પ્રદર્શન એવા સમયે થઈ રહ્યા છે જ્યારે PoKમાં બીજા તબક્કાની ચૂંટણી માટે મતદાન થઈ રહ્યું છે. આ દરમિયાન ઘણી જગ્યાએ મતદાન પ્રક્રિયામાં સમસ્યાઓ સામે આવી હતી. ચૂંટણી પ્રણાલીને લઈને પણ સવાલો ઉઠાવવામાં આવ્યા હતા, જેના કારણે ચૂંટણીની નિષ્પક્ષતાની ચર્ચાએ જોર પકડ્યું છે.
રવિવારે કુલ 21 બેઠકો પર મતદાન થયું હતું. તેમાં મુઝફ્ફરાબાદ વિભાગની 9 બેઠકો અને પાકિસ્તાનના વિવિધ ભાગોમાં હાજર શરણાર્થીઓ માટે 12 બેઠકોનો સમાવેશ થાય છે. મતદાન દરમિયાન, કાશ્મીરી સમુદાયે પીઓકેના ઘણા વિસ્તારોમાં તેમજ પાકિસ્તાનના અન્ય શહેરોમાં વિરોધ પ્રદર્શન કર્યું હતું.
પ્રદર્શન ચાલુ, લોંગ માર્ચની જાહેરાત
દિવસભર અનેક જગ્યાએ દેખાવો ચાલુ રહ્યા હતા. વિરોધીઓએ ઈસ્લામાબાદમાં ડી-ચોક પર ધરણા કર્યા અને મુઝફ્ફરાબાદ સુધી લોંગ માર્ચની જાહેરાત પણ કરી.
રાવલકોટથી પ્રાપ્ત માહિતી અનુસાર, પ્રદર્શન દરમિયાન સુરક્ષા દળોએ કેટલીક જગ્યાએ ગોળીબાર પણ કર્યો હતો. જોકે, કોઈને ઈજા થઈ હોવાની પુષ્ટિ થઈ નથી.
હડતાલ 50 દિવસ સુધી ચાલુ રહેશે
પીઓકેના ડ્રેક ઇદગાહ વિસ્તારમાં પણ લોકોનો વિરોધ ચાલુ છે. છેલ્લા 50 દિવસથી અહીં વિરોધ પ્રદર્શન ચાલી રહ્યા છે. મહિલાઓ અને બાળકોએ પણ વિરોધમાં ભાગ લીધો હતો અને કહ્યું હતું કે જ્યાં સુધી તેમની માંગણીઓ સંતોષવામાં નહીં આવે ત્યાં સુધી તેમનો વિરોધ ચાલુ રહેશે.
પીઓકેમાં ચૂંટણીઓ વચ્ચે ચાલી રહેલા વિરોધ પ્રદર્શનથી ત્યાંનું રાજકીય વાતાવરણ વધુ તંગ બન્યું છે.
