ગુરુવારે ઈન્ડોનેશિયાના ઉત્તર મોલુકા સમુદ્રમાં 7.6ની તીવ્રતાનો અત્યંત શક્તિશાળી ભૂકંપ આવ્યો હતો. આ ભયંકર આંચકાએ ઘણી ઈમારતોને નુકસાન પહોંચાડ્યું તો દરિયામાં સુનામીના મોજા પણ સર્જાયા. અધિકારીઓ અને પ્રત્યક્ષદર્શીઓના જણાવ્યા અનુસાર, આ દુર્ઘટનામાં અત્યાર સુધીમાં એક વ્યક્તિના મોતના અહેવાલ છે.
સુનામી અને આફ્ટરશોક એલર્ટ
ઇન્ડોનેશિયાની હવામાન એજન્સી (BMKG) એ અહેવાલ આપ્યો છે કે પાંચ અલગ-અલગ સ્થળોએ સુનામીના મોજા જોવા મળ્યા હતા. ઉત્તર સુલાવેસીના ઉત્તર મિનાહાસામાં 0.75 મીટર (લગભગ 2.46 ફૂટ)ની સૌથી વધુ તરંગ નોંધાઈ હતી. ભૂકંપ પછી પણ 11 આફ્ટરશોક અનુભવાયા હતા, જેમાંથી સૌથી મજબૂત 5.5 મેગ્નિટ્યુડનો હતો.
BMKGના વડા તેકુ ફૈઝલ ફથાનીએ એક પ્રેસ કોન્ફરન્સમાં જણાવ્યું હતું કે તેમના પ્રારંભિક મોડેલિંગ મુજબ, તરંગો 0.5 મીટરથી 3 મીટર (1.6 થી 9.8 ફૂટ) ઊંચાઈ સુધી પહોંચવાની અપેક્ષા હતી. એજન્સીએ સામાન્ય લોકોને સંપૂર્ણપણે સતર્ક રહેવાની અપીલ કરી છે.
કાટમાળ નીચે દબાઈ જવાથી એકનું મોત થયું હતું
નોર્થ સુલાવેસી પોલીસના ડેપ્યુટી ચીફ અવી સેતોનોએ પત્રકારોને જણાવ્યું હતું કે મનાડો વિસ્તારમાં સ્થાનિક સ્પોર્ટ્સ ઓથોરિટી બિલ્ડિંગનો એક ભાગ ધરાશાયી થયો હતો. તેના કાટમાળથી એક વ્યક્તિનું કરૂણ મોત નીપજ્યું હતું.
જમીન પર શું સ્થિતિ છે?
ઈંડોનેશિયાના ‘મેટ્રો ટીવી’ પર ઈમારતોને નુકસાનનો વીડિયો બતાવવામાં આવ્યો છે. મનાડોમાં રહેતી એક મહિલાએ જણાવ્યું કે આંચકા એટલા જોરદાર હતા કે લોકો ગભરાઈને ઘરની બહાર ભાગવા લાગ્યા. મહિલાના જણાવ્યા અનુસાર, તેના વિસ્તારમાં બહારથી કોઈ મોટું નુકસાન જોવા મળ્યું ન હતું, પરંતુ આંચકાના કારણે છાજલીઓમાં રાખેલી વસ્તુઓ નીચે પડી ગઈ હતી અને તે વિસ્તારની વીજળી ડૂલ થઈ ગઈ હતી. બિટુંગ અને ટર્નેટ શહેરમાં 10 થી 20 સેકન્ડ સુધી ભૂકંપના આંચકા ખૂબ જ જોરદાર અનુભવાયા હતા.
