કહેવાતા કાશ્મીર એકતા દિવસના અવસર પર, પાકિસ્તાન અને પાકિસ્તાન અધિકૃત કાશ્મીર (PoK) માં કાર્યરત આતંકવાદી સંગઠનોએ ફરી એકવાર ભારત વિરુદ્ધ ઝેર ઓક્યું છે. જૈશ-એ-મોહમ્મદ (JeM) અને લશ્કર-એ-તૈયબા (LeT)ના ટોચના કમાન્ડરોએ જાહેર સભાઓમાં ભડકાઉ ભાષણો આપ્યા છે જેમાં ભારતના મોટા શહેરો પર હુમલા અને સીધા જેહાદનું આહ્વાન કર્યું છે. આ ધમકીઓ બાદ ભારતીય ગુપ્તચર એજન્સીઓ હાઈ એલર્ટ પર છે.
આગ્રા અને દિલ્હીમાં આતંક મચાવવાનું લશ્કરનું કાવતરું
લાહોરમાં આયોજિત રેલીમાં લશ્કર-એ-તૈયબાના આતંકવાદી સૈયદ અબ્દુલ રહેમાન નકવીએ ભારતની પ્રાદેશિક અખંડિતતાને સીધો પડકાર ફેંક્યો હતો. હાફિઝ સઈદના રાજકીય મોરચા ‘પાકિસ્તાન મરકઝી મુસ્લિમ લીગ’ના કમાન્ડર રહેલા નકવીએ ભીડને સંબોધતા કહ્યું – અમે આગરામાં આગ લગાવીશું, ડેક્કનને જગાડીશું અને દિલ્હીને હલાવીશું.
નકવીએ ‘સંયુક્ત ભારત’ના વિચારને તોડી પાડવા અને તેમના પૂર્વજોના ‘વસિયતનામું’ પૂર્ણ કરવાની પ્રતિજ્ઞા લીધી. ઉલ્લેખનીય છે કે નકવીના હાફિઝ સઈદ અને તેના પુત્ર તલ્હા સઈદ સાથે ખૂબ જ નજીકના સંબંધો છે.
જૈશ કમાન્ડરનો વૈશ્વિક દળો માટે ખતરો
બીજી તરફ જૈશ-એ-મોહમ્મદના કમાન્ડર મસૂદ ઇલ્યાસ કાશ્મીરીએ પીઓકેના રાવલકોટમાં એક વિશાળ જનસભાને સંબોધી હતી. પાકિસ્તાની યુવાનોને આતંકવાદી સંગઠનમાં જોડાવા માટે ઉશ્કેરતા કાશ્મીરીએ કહ્યું કે તેના સમર્થકો દુશ્મનને કચડી નાખવા માટે પૂરી તાકાત અને આતંક સાથે તૈયાર છે.
મસૂદ ઇલ્યાસ કાશ્મીરીના ભાષણની વિશેષતાઓ:
વૈશ્વિક ખતરો: તેમણે દિલ્હીની સાથે સાથે અમેરિકા, ઈંગ્લેન્ડ અને ઈઝરાયેલના પીએમ નેતન્યાહુને પણ કડક સંદેશ આપવાની ચેતવણી આપી હતી.
