ભારત અને ન્યુઝીલેન્ડ વચ્ચે રવિવાર (11 જાન્યુઆરી)થી ત્રણ મેચની વનડે શ્રેણી રમાશે. આગામી સિરીઝ માટે બંને ટીમો વડોદરા પહોંચી ગઈ છે અને ભારતીય ટીમે પણ તૈયારીઓ શરૂ કરી દીધી છે. ન્યુઝીલેન્ડ સામેની વનડે સીરીઝ દરમિયાન ભારતના દિગ્ગજ વિરાટ કોહલી અને રોહિત શર્માના પ્રદર્શન પર પણ તમામની નજર રહેશે. આ સીરીઝ દરમિયાન વિરાટ કોહલી પાસે એક મોટો રેકોર્ડ પોતાના નામે કરવાની તક હશે. વિરાટ કોહલી શાનદાર ફોર્મમાં છે અને તેણે આફ્રિકા સામે બે સદી પણ ફટકારી છે. ગયા મહિને, વિરાટ કોહલીએ વિજય હજારે ટ્રોફીમાં જોરદાર પ્રદર્શન કર્યું હતું અને બે મેચમાં 131 અને 77 રનની ઇનિંગ્સ રમી હતી.
ભારત અને ન્યુઝીલેન્ડ વચ્ચેની વનડે મેચમાં સૌથી વધુ રન બનાવવાનો રેકોર્ડ મહાન ક્રિકેટર સચિન તેંડુલકરના નામે છે. પૂર્વ ભારતીય બેટ્સમેન સચિન તેંડુલકરે ન્યૂઝીલેન્ડ સામેની 42 ODI મેચોમાં 1750 રન બનાવ્યા છે, જેમાં 5 સદી સામેલ છે. વિરાટના ફોર્મને જોતા સચિનનો આ રેકોર્ડ હવે જોખમમાં છે. જ્યારે વિરાટ કોહલીએ ભારત વિરુદ્ધ ન્યૂઝીલેન્ડ વનડે શ્રેણીમાં 31 મેચમાં 1657 રન બનાવ્યા છે. વિરાટ કોહલીને સચિનનો રેકોર્ડ તોડવા માટે માત્ર 94 રનની જરૂર છે. જો તે ત્રણ મેચ દરમિયાન આવું કરવામાં સફળ રહેશે તો તે આ રેકોર્ડ પોતાના નામે કરી લેશે. ન્યુઝીલેન્ડ માટે સૌથી વધુ રન રોસ ટેલરના નામે છે. તેણે 35 મેચમાં 1385 રન બનાવ્યા છે. કેન વિલિયમસને 31 મેચમાં 1239 રન બનાવ્યા છે.
પૂર્વ ભારતીય કેપ્ટન વિરાટ કોહલી હાલમાં તેની કારકિર્દીના શ્રેષ્ઠ તબક્કામાંથી પસાર થઈ રહ્યો છે. 2025નું વર્ષ તેના માટે ઘણું સારું રહ્યું અને હવે 2026ની શરૂઆતમાં પણ તે જબરદસ્ત ફોર્મમાં જોવા મળી રહ્યો છે. ગયા વર્ષે, વિરાટે 13 ODI ઇનિંગ્સમાં 65.10ની એવરેજથી 651 રન બનાવ્યા હતા, જેમાં 3 સદી અને 4 અડધી સદી સામેલ હતી. ભારત અને ન્યુઝીલેન્ડ વચ્ચેની પ્રથમ ODI 11 જાન્યુઆરીએ વડોદરામાં રમાશે જ્યારે આગામી બે મેચ રાજકોટ અને ઈન્દોરમાં અનુક્રમે 14 અને 18 જાન્યુઆરીએ રમાશે.
