અમેરિકા અને ઈઝરાયેલ સાથેના યુદ્ધ વચ્ચે ઈરાનની મહિલા ફૂટબોલ ટીમ એશિયન કપમાં રમી રહી છે. આ દરમિયાન મહિલા ખેલાડીઓએ અલગ રીતે પોતાનો વિરોધ વ્યક્ત કર્યો હતો. ઈરાનની મહિલા ફૂટબોલ ટીમે એશિયન કપમાં દક્ષિણ કોરિયા સામેની મેચ પહેલા ઈસ્લામિક શાસનનું રાષ્ટ્રગીત ગાવાનો ઈન્કાર કર્યો હતો. વિમેન્સ એશિયન કપ ફૂટબોલ ટુર્નામેન્ટમાં ઝહરા ખનબારીની આગેવાની હેઠળની ઈરાનની ટીમ દક્ષિણ કોરિયા સામે હારી ગઈ હતી.
ખેલાડીઓ ઉદાસ દેખાતા હતા
રાષ્ટ્રગીત દરમિયાન ઈરાનના ખેલાડીઓ ઉદાસ દેખાતા હતા. તે જ સમયે, મેચ પહેલા, મુખ્ય કોચ મરઝિયાહ જાફરીએ હુમલા અને તેના દેશના સર્વોચ્ચ નેતા અયાતુલ્લાહ અલી ખામેનીના મૃત્યુ અંગે નિવેદન આપવાનો ઇનકાર કર્યો હતો. તેણે કહ્યું કે ટીમે ટૂર્નામેન્ટ પર ધ્યાન કેન્દ્રિત કરવાની જરૂર છે. જોકે, ગોલ્ડ કોસ્ટ સ્ટેડિયમમાં સમર્થકોને જોઈને તેના ચહેરા પર પણ સ્મિત જોવા મળ્યું હતું.
પ્રથમ મેચમાં હાર
જોકે આ મેચમાં ઈરાનની ટીમને હારનો સામનો કરવો પડ્યો હતો. 2022 મહિલા એશિયન કપની ઉપવિજેતા દક્ષિણ કોરિયાએ 3-0થી જીત મેળવી હતી. ટૂર્નામેન્ટમાં ઈરાન ટીમનું લક્ષ્ય આગામી વર્ષે બ્રાઝિલમાં યોજાનાર મહિલા વર્લ્ડ કપમાં સ્થાન નિશ્ચિત કરવાનું છે. આ માટે તેણે ઓસ્ટ્રેલિયામાં ઓછામાં ઓછા ક્વાર્ટર ફાઇનલમાં પહોંચવું પડશે. ઈરાનની આગામી મેચ ગુરુવારે યજમાન ઓસ્ટ્રેલિયા સામે થશે.
