છેલ્લા કેટલાક અઠવાડિયાથી ભારતના પડોશમાં તણાવ સતત વધી રહ્યો છે અને હવે પાકિસ્તાન અને અફઘાનિસ્તાન મોટા યુદ્ધની અણી પર ઉભા હોય તેવું લાગી રહ્યું છે. હવે આ તણાવનો ઉકેલ વાતચીત દ્વારા શોધવાના પ્રયાસને બદલે પાકિસ્તાન ક્યારેક યુદ્ધવિરામનો ભંગ કરીને તો ક્યારેક ઉશ્કેરણીજનક નિવેદનો કરીને અફઘાનિસ્તાનની તાલિબાન સરકારને ભડકાવી રહ્યું છે. હવે ફરી એકવાર પાકિસ્તાનના સંરક્ષણ મંત્રીએ તાલિબાન શાસનને ધમકી આપી છે. પાકિસ્તાનના સંરક્ષણ પ્રધાન ખ્વાજા આસિફે બુધવારે અફઘાનિસ્તાનને ચેતવણી આપી હતી કે પાકિસ્તાનની ધરતી પર કોઈપણ નવા આત્મઘાતી હુમલાનો સખત જવાબ આપવામાં આવશે. ખ્વાજા આસિફે આ વાતો ઈસ્તાંબુલમાં બંને દેશો વચ્ચેની વાતચીત નિષ્ફળ ગયાના થોડા કલાકો બાદ કહી હતી.
નોંધનીય છે કે આ મહિનાની શરૂઆતમાં પાકિસ્તાને અફઘાનિસ્તાનમાં તાલિબાનની અનેક જગ્યાઓ પર હુમલા કર્યા હતા, જેમાં ડઝનબંધ લોકો માર્યા ગયા હતા. અફઘાનિસ્તાને કહ્યું હતું કે માર્યા ગયેલા નાગરિકો હતા અને તાલિબાન સરકારે પાકિસ્તાની સૈન્ય ચોકીઓ પર હુમલો કરીને જવાબ આપ્યો હતો. તાલિબાને દાવો કર્યો હતો કે આ દરમિયાન 58 પાકિસ્તાની સૈનિકો માર્યા ગયા હતા. હાલમાં, યુદ્ધને રોકવા માટે બંને પક્ષો વચ્ચે કોઈ સહમતિ સધાઈ નથી. બંને પક્ષો 19 ઓક્ટોબરના રોજ દોહામાં કતાર સહિત અન્ય દેશો દ્વારા મધ્યસ્થી કરવામાં આવેલા યુદ્ધવિરામ માટે સંમત થયા હતા, ત્યારબાદ ઈસ્તાંબુલમાં ચાર દિવસની વાટાઘાટો થઈ હતી. જોકે આ ચર્ચાનું કોઈ પરિણામ આવ્યું નથી.
ખ્વાજા આસિફની ધમકી
હવે સોશિયલ મીડિયા પ્લેટફોર્મ પર એક પોસ્ટમાં ખ્વાજા આસિફે આગળ કહ્યું, ‘જો તેઓ એવું ઈચ્છે તો તોરા બોરામાં તેમની હાર ત્યાંના લોકો માટે જોવાલાયક તમાશો હશે.’
તુર્કિયેમાં શાંતિ મંત્રણા નિષ્ફળ ગઈ
દરમિયાન, અફઘાનિસ્તાને તુર્કિયેમાં નિષ્ફળ શાંતિ વાટાઘાટો માટે પાકિસ્તાનને જવાબદાર ઠેરવ્યું છે. મળતી માહિતી મુજબ, પાકિસ્તાન અફઘાન એરસ્પેસના ઉલ્લંઘનને રોકવા અને અમેરિકન ડ્રોન ઉડાન રોકવા માટે સહમત નથી. બંને દેશોની સરહદ 2 અઠવાડિયાથી વધુ સમયથી બંધ છે.
