જમ્મુ-કાશ્મીરના સાંબા જિલ્લામાં પાકિસ્તાની સરહદ નજીક એક શંકાસ્પદ ડ્રોન જોવા મળ્યું છે. પાકિસ્તાન તરફથી આવતા આ ડ્રોનને કારણે ફરી એકવાર ઘૂસણખોરીનો ભય વધી ગયો છે. અહેવાલો અનુસાર, આ ડ્રોન રામગઢ સેક્ટરના કેસો મહાસન ગામ પાસે જોવા મળ્યા છે. માહિતી મળતા જ અધિકારીઓએ આ સમગ્ર વિસ્તારમાં એલર્ટ જાહેર કરી દીધું છે.
ડ્રોનના કારણે જારી કરાયેલા આ એલર્ટની વચ્ચે સાંજે પૂંછ સેક્ટરના દેગવાર ગામ ઉપર કેટલાક ડ્રોન જેવા પદાર્થ ઉડતા જોવા મળ્યા હતા. ભારતીય સેનાએ તેને નીચે લાવવા માટે કેટલાક રાઉન્ડ ફાયરિંગ પણ કર્યું હતું. ઓપરેશન સિંદૂર બાદ ભારતીય દળો સતત એલર્ટ પર છે.
ઉલ્લેખનીય છે કે છેલ્લા કેટલાક દિવસોમાં સરહદ પર શંકાસ્પદ ડ્રોન જોવાની આ ત્રીજી ઘટના છે. આ ઘટના એવા સમયે બની છે જ્યારે મંગળવારે જ આર્મી ચીફ ઉપેન્દ્ર દ્વિવેદીએ નિયંત્રણ રેખા પર દેખાતા ડ્રોન અંગે ચિંતા વ્યક્ત કરી હતી. તેમણે કહ્યું કે નવી દિલ્હીએ ઈસ્લામાબાદને સ્પષ્ટ કરી દીધું છે કે આવી પ્રવૃત્તિ “સ્વીકાર્ય નથી”. આ સિવાય પશ્ચિમી મોરચાના તમામ પડકારોનો સામનો કરવા માટે ઓપરેશન સિંદૂર હજુ પણ ચાલુ છે. તેમણે કહ્યું કે પ્રારંભિક તપાસમાં નાના અને રક્ષણાત્મક ડ્રોન હોવાનું જણાય છે, જે સંભવતઃ સરહદ નજીક ભારતીય ગતિવિધિઓ પર નજર રાખવા માટે તૈનાત છે.
વાર્ષિક પ્રેસ કોન્ફરન્સને સંબોધતા જનરલ દ્વિવેદીએ જણાવ્યું હતું કે મંગળવારે પાકિસ્તાન સાથે ડાયરેક્ટર જનરલ ઓફ મિલિટરી ઓપરેશન્સ સ્તરની વાટાઘાટો યોજાઈ હતી, જેમાં ભારતે જમ્મુ અને કાશ્મીરમાં જોવા મળેલી ડ્રોન પ્રવૃત્તિઓ પર ચિંતા વ્યક્ત કરી હતી. “અમે પાકિસ્તાનને તેના ડ્રોન પર લગામ લગાવવા કહ્યું છે,” તેમણે ઉમેર્યું હતું કે, સેના સંપૂર્ણ રીતે સતર્ક છે અને ભવિષ્યમાં કોઈપણ દુ:સાહસનો સામનો કરવા માટે તૈયાર છે.
અપડેટ કરવામાં આવી રહ્યું છે.
