દુબઈ એર શો દરમિયાન તેજસ ફાઈટર ક્રેશ થયું. તેજસ ફાઇટર એટલું બળી ગયું કે માત્ર રાખ જ રહી ગઈ. દુર્ઘટના બાદ દુબઈ સરકારે તસવીર જાહેર કરી છે. આ તસવીરમાં તેજસનો કાટમાળ વેરવિખેર જોવા મળે છે. દરમિયાન ફાયર બ્રિગેડ આગ ઓલવવામાં વ્યસ્ત છે. દુબઈ મીડિયા ઓફિસ તરફથી આ સંબંધમાં એક નિવેદન પણ જારી કરવામાં આવ્યું છે. જેમાં લખ્યું છે કે દુબઈ એર શોમાં ભાગ લઈ રહેલું તેજસ ફાઈટર એરક્રાફ્ટ પ્રદર્શન દરમિયાન ક્રેશ થઈ ગયું હતું. આ દુર્ઘટનામાં પાયલોટનું પણ મોત થયું હતું. ઘટનાની જાણ થતાં જ ઈમરજન્સી અને ફાયર ફાઈટીંગ ટીમો સક્રિય થઈ ગઈ હતી.
વિવિધ ટીવી ચેનલો પર બતાવવામાં આવેલા અકસ્માતના દ્રશ્યોમાં વિમાન ઊંચાઈથી નીચે પડતું અને પછી આગના ગોળામાં ફાટતું દેખાતું હતું. આંતરરાષ્ટ્રીય મીડિયાના અહેવાલ મુજબ, સ્થાનિક સમય અનુસાર બપોરે એક એરશોમાં એર ડિસ્પ્લે દરમિયાન ટેક ઓફ કરતી વખતે પ્લેન ક્રેશ થયું હતું.
નોંધનીય છે કે ભારતીય વાયુસેના (IAF) ફાઇટર એરક્રાફ્ટ તેજસ શુક્રવારે દુબઇ એરશોમાં એર ડિસ્પ્લે દરમિયાન ક્રેશ થયું હતું અને આ દુર્ઘટનામાં પાઇલટનું મૃત્યુ થયું હતું. IAFએ આ જાણકારી આપી. ભારતીય વાયુસેનાએ એક સંક્ષિપ્ત નિવેદનમાં જણાવ્યું હતું કે અકસ્માતનું કારણ નક્કી કરવા માટે ‘કોર્ટ ઓફ ઈન્ક્વાયરી’ની રચના કરવામાં આવી રહી છે.
IAF એ ટ્વિટર પર જારી કરેલા એક નિવેદનમાં જણાવ્યું છે કે IAF આ દુર્ઘટનામાં જાન-માલના નુકસાનથી ખૂબ જ દુઃખી છે અને આ દુઃખની ઘડીમાં શોકગ્રસ્ત પરિવાર સાથે મજબૂત રીતે ઊભું છે. અકસ્માતના કારણો શોધવા માટે ‘કોર્ટ ઓફ ઈન્કવાયરી’ની રચના કરવામાં આવી રહી છે.
