અમેરિકા અને ઈરાન વચ્ચે યુદ્ધવિરામની દલાલીના પાકિસ્તાનના પ્રયાસો સંપૂર્ણપણે નિષ્ફળ ગયા છે. વોલ સ્ટ્રીટ જર્નલે શુક્રવારે મધ્યસ્થીઓને ટાંકીને આ માહિતી આપી હતી. ઈરાને પાકિસ્તાન સહિત મધ્યસ્થી કરનારા દેશોને સ્પષ્ટ સંદેશ આપ્યો છે કે તે આગામી દિવસોમાં ઈસ્લામાબાદમાં અમેરિકી અધિકારીઓને મળવા તૈયાર નથી અને અમેરિકાની માગણીઓને સંપૂર્ણપણે અસ્વીકાર્ય માને છે. એકંદરે, આ વાતચીત હવે ‘ડેડ એન્ડ’ સુધી પહોંચી ગઈ છે.
ઈરાનનો ઈન્કાર અને અમેરિકાની માગણી
સૂત્રોના જણાવ્યા અનુસાર ઈરાને યુદ્ધવિરામ માટે પોતાની શરતોનો પુનરોચ્ચાર કર્યો છે. શરૂઆતમાં, ઈરાને કહ્યું હતું કે યુ.એસ. યુદ્ધ વળતર ચૂકવે, મધ્ય પૂર્વમાં તેના તમામ સૈન્ય મથકોમાંથી પાછી ખેંચે અને ભવિષ્યના કોઈપણ હુમલાથી સુરક્ષાની ખાતરી આપે તો જ તે યુદ્ધનો અંત લાવશે. આ માંગણીઓ પર કોઈ સમજૂતી ન થવાને કારણે મંત્રણા અટકી છે.
રિપોર્ટ અનુસાર, પાકિસ્તાનના નેતૃત્વમાં મંત્રણાને આગળ વધારવાના આ પ્રયાસને કોઈ સફળતા મળી શકી નથી. ઈરાને સ્પષ્ટ કર્યું છે કે તેને અમેરિકાની માગણીઓ ‘અસ્વીકાર્ય’ લાગે છે. તે પાકિસ્તાનની રાજધાની ઈસ્લામાબાદમાં અમેરિકી અધિકારીઓ સાથે મળવા માટે તેના કોઈપણ અધિકારીને મોકલશે નહીં. આ કડક વલણે વાટાઘાટોના વર્તમાન માળખાના દરવાજા અસરકારક રીતે બંધ કરી દીધા છે.
પાકિસ્તાનની હવા નીકળી ગઈ!
છેલ્લા કેટલાક અઠવાડિયાથી પાકિસ્તાન બેકડોર ડિપ્લોમસી દ્વારા અમેરિકા અને ઈરાન વચ્ચે મધ્યસ્થીની ભૂમિકા ભજવવાનો પ્રયાસ કરી રહ્યું હતું. પાકિસ્તાનના વડા પ્રધાન શેહબાઝ શરીફ અને વિદેશ પ્રધાન ઇશાક ડારે જાહેરમાં ઇસ્લામાબાદમાં અર્થપૂર્ણ અને નિર્ણાયક મંત્રણાની યજમાની કરવાની ઓફર કરી હતી. આ દિશામાં પાકિસ્તાને અમેરિકા વતી ઈરાનને 15 મુદ્દાનો યુદ્ધવિરામ પ્રસ્તાવ રજૂ કર્યો હતો. અગાઉ ચીન અને પાકિસ્તાને સંયુક્ત રીતે 5 મુદ્દાની શાંતિ યોજના પણ રજૂ કરી હતી.
