નેધરલેન્ડ ટીમના ઓલરાઉન્ડર બાસ ડીલીડને ક્રિકેટ વારસામાં મળ્યું છે, જેના પિતા ટિમ ડીલીડ દેશ માટે રમ્યા છે, જ્યારે તેનો નાનો ભાઈ અંડર-19 ડચ ટીમનો ભાગ રહી ચૂક્યો છે. દરમિયાન, ‘કઝીન’ બેબેટ ડચ મહિલા રાષ્ટ્રીય ટીમમાં રમે છે. નેધરલેન્ડના આ ઓલરાઉન્ડરે નામિબિયા સામે બોલ અને બેટ વડે શાનદાર પ્રદર્શન કર્યું હતું. આ મેચમાં તેને પ્લેયર ઓફ ધ મેચ પણ પસંદ કરવામાં આવ્યો હતો.
નામીબિયા સામે 48 બોલમાં અણનમ 72 રન બનાવ્યા પહેલા બે વિકેટ ઝડપનાર આ ઓલરાઉન્ડરને જ્યારે આ પ્રદર્શન વિશે પૂછવામાં આવ્યું ત્યારે તેની પ્રથમ પ્રતિક્રિયા હતી, “હું ક્રિકેટરોના પરિવારમાંથી આવું છું અને આ પ્રદર્શન ચોક્કસપણે મારા પરિવારને મારા પર ગર્વ કરાવશે.” તેના પિતા ટિમ ડીલીડ 1996, 2003 અને 2007 ODI વર્લ્ડ કપમાં નેધરલેન્ડ માટે રમી ચૂક્યા છે.
જ્યારે તેને પૂછવામાં આવ્યું કે શું તેણે વર્લ્ડ કપ પહેલા તેના પિતા પાસેથી કેટલીક ટીપ્સ લીધી હતી? આના પર જુનિયર ડીલીડે કહ્યું, “તે એ જમાનામાં ક્રિકેટ રમ્યો હતો જ્યારે T20 ક્રિકેટ એટલું રમાતી ન હતી, પરંતુ ત્રણ વર્ષ પહેલા, 2023 ODI વર્લ્ડ કપ પહેલા મેં તેની સાથે ભારતમાં રમવાની વાત કરી હતી. હવે સમય બદલાઈ ગયો છે અને આજનું ક્રિકેટ તેના જમાનાના ક્રિકેટથી અલગ છે. આવી સ્થિતિમાં મારા માટે ટિપ્સ કરતાં તેમનો સપોર્ટ વધુ મહત્વનો છે.”
ટુર્નામેન્ટની પહેલી જ મેચમાં અપસેટ સર્જવાની નજીક પહોંચેલી નેધરલેન્ડની ટીમ ત્રણ વિકેટથી હારી ગઈ હતી. જીતવા માટેના 148 રનના લક્ષ્યાંકનો પીછો કરતા પાકિસ્તાને ત્રણ બોલ બાકી રહેતા સાત વિકેટે 148 રન બનાવી લીધા હતા. જો નેધરલેન્ડની ટીમે 19મી ઓવરમાં પાકિસ્તાન સામે નિયંત્રણ બતાવ્યું હોત તો અપસેટ સર્જાઈ શક્યો હોત. નેધરલેન્ડે તે ઓવરમાં 20થી વધુ રન આપ્યા હતા.
તે મેચમાં 25 બોલમાં 30 રન બનાવનાર 26 વર્ષીય બેસ ડીલીડે કહ્યું, “અમે પ્રથમ મેચ નાના અંતરથી હારી ગયા હતા, પરંતુ આજે અમે બતાવ્યું કે અમે જે પ્રકારનું ક્રિકેટ રમવા માંગીએ છીએ તે કામ કરી રહ્યું છે.” અમારે આગામી ત્રણ મેચ અલગ-અલગ જગ્યાએ રમવાની છે પરંતુ આજના પ્રદર્શનથી મનોબળ વધશે.
