ઈરાન સાથે અમેરિકા અને ઈઝરાયેલનો સંઘર્ષ ચાલુ છે. આ દરમિયાન સંયુક્ત આરબ અમીરાત (UAE)એ ચોંકાવનારું નિવેદન આપ્યું છે. UAE એ US-ઈરાન સંઘર્ષમાં સીધા સામેલ થવાનો ઈરાદો વ્યક્ત કર્યો છે. તેણે હોર્મુઝ સ્ટ્રેટને બળપૂર્વક ફરીથી ખોલવાની તેની યોજના વિશ્વ સમક્ષ રજૂ કરી છે. મીડિયા રિપોર્ટ્સ અનુસાર, UAE આ માટે સંયુક્ત રાષ્ટ્ર સુરક્ષા પરિષદ (UNSC)માં પ્રસ્તાવ લાવવાનો પ્રયાસ કરી રહ્યું છે, જેથી આંતરરાષ્ટ્રીય સ્તર પર સૈન્ય કાર્યવાહીને કાયદેસર બનાવી શકાય. કહેવામાં આવી રહ્યું છે કે અમેરિકાની સાથે UAEએ પણ યુરોપ અને એશિયાની સૈન્ય શક્તિઓને આ મિશનમાં સામેલ થવાનો અનુરોધ કર્યો છે.
જો યુએઈ આ યુદ્ધમાં સીધું જ જોડાય છે, તો તે ગલ્ફ ક્ષેત્રનો પહેલો દેશ હશે જે ઔપચારિક રીતે આ સંઘર્ષનો ભાગ બનશે. આ પહેલા UAE મધ્યસ્થીની ભૂમિકા ભજવવાનો પ્રયાસ કરી રહ્યું હતું. રિપોર્ટ અનુસાર, UAEને આશા છે કે જો UNSC તરફથી મંજૂરી મળી જાય તો એશિયા અને યુરોપના ઘણા દેશો પણ આ અભિયાનમાં જોડાઈ શકે છે. જોકે, રશિયા અને ચીન આ પ્રસ્તાવને વીટો કરી શકે છે. જેના કારણે તેને પાસ કરવામાં મુશ્કેલી પડી શકે છે. આમ છતાં ખાડી દેશોના અધિકારીઓનું કહેવું છે કે UAE ઔપચારિક મંજૂરી વિના પણ લશ્કરી સહયોગ આપવા તૈયાર છે.
યુએઈએ એવું પણ સૂચન કર્યું છે કે યુ.એસ.એ સ્ટ્રેટ ઓફ હોર્મુઝના કેટલાક ટાપુઓ પર નિયંત્રણ મેળવવું જોઈએ, જેમ કે અબુ મુસા, જે છેલ્લા કેટલાક દાયકાઓથી ઈરાનના કબજા હેઠળ છે પરંતુ યુએઈ દાવો કરે છે.
