ઈરાનના પૂર્વ સર્વોચ્ચ નેતા આયાતુલ્લા અલી ખામેનીને ગુરુવારે અંતિમ સંસ્કાર કરવામાં આવશે. આ પહેલા ઈરાને પ્રથમ વખત તેહરાનમાં દેશના અલી ખામેનીના ઘરની અંદર તબાહીનો વીડિયો જાહેર કર્યો છે. વીડિયો જોઈને અનુમાન લગાવી શકાય છે કે ઈઝરાયલ અને અમેરિકાએ પૂરી તાકાતથી ખમેનીના ઘરને નિશાન બનાવ્યું અને નક્કી કર્યું કે તે કોઈ પણ રીતે ભાગી ન શકે.
ઉલ્લેખનીય છે કે 28 ફેબ્રુઆરીના રોજ અમેરિકા અને ઈઝરાયેલે ઈરાન પર જોરદાર હુમલો કર્યો હતો. મિસાઇલોએ સર્વોચ્ચ નેતાના ઘરને પણ નિશાન બનાવ્યું હતું. આ હુમલામાં 86 વર્ષીય આયાતુલ્લા અલી ખમેનીનું મોત થયું હતું. અહેવાલો અનુસાર, હુમલામાં ખામેનીની સાથે તેમની પત્ની, તેમની પુત્રી, જમાઈ અને પૌત્રી પણ માર્યા ગયા હતા. એવા પણ સમાચાર છે કે ઈરાનના વર્તમાન સર્વોચ્ચ નેતા મોજતબા ખમેની આ હુમલામાં ખરાબ રીતે ઘાયલ થયા હતા અને તેમણે પોતાનો એક પગ પણ ગુમાવ્યો હતો.
35 સેકન્ડના વીડિયોમાં જોવા મળે છે ભયાનક વિનાશ
એનડીટીવીના અહેવાલ અનુસાર, ઈરાન દ્વારા જાહેર કરવામાં આવેલ નવો વીડિયો ઈમામ ખોમેની હુસૈનિયાનો છે, જે ખમેનીના કમ્પાઉન્ડની અંદરનો મુખ્ય હોલ છે. વીડિયોમાં જોઈ શકાય છે કે આ સંકુલ હવે માટીમાં ફેરવાઈ ગયું છે. હોલની અંદર ચારેબાજુ કોંક્રિટ અને કાટમાળના ઊંચા ઢગલા છે. છત અને દીવાલો સંપૂર્ણપણે ધરાશાયી થઈ ગઈ છે, લોખંડના મોટા બીમ વાંકા વળી ગયા છે.
અહેવાલ મુજબ, અલી ખમેનીએ આ હુસૈનિયા હોલનો ઉપયોગ દેશની સૌથી મહત્વપૂર્ણ વ્યૂહાત્મક બેઠકો યોજવા અને જાહેર સંબોધન કરવા માટે કર્યો હતો. અત્યાર સુધી તેના બાહ્ય ભાગની માત્ર સેટેલાઇટ તસવીરો સામે આવી હતી, પરંતુ આંતરિક વિનાશ પહેલીવાર જોવા મળ્યો છે.
