વડોદરાઃ વાઘોડિયા રોડ પર વડોદરા મ્યુનિસિપલ કોર્પોરેશનની બેદરકારી જોવા મળી છે. રસ્તા પર કોઈ પણ જાતના અડચણ વગર મોટો ખાડો ખોદવામાં આવ્યો હતો. રાત્રિના સમયે એક રિક્ષાચાલક ત્યાંથી પસાર થઈ રહ્યો હતો, તેને ખાડાની જાણ ન થઈ અને રિક્ષા ખાડામાં પડી ગઈ. જોકે, સદનસીબે રિક્ષાચાલકનો જીવ બચી ગયો હતો. ઘટનાને લઈને પાલિકાની કામગીરી સામે રોષ જોવા મળી રહ્યો છે.
ચોમાસાના પ્રારંભે જ પાલિકાની પ્રિ-મોન્સુન કાર્યવાહીની પોલ ખુલી રહી છે. થોડો વરસાદ પડતાની સાથે જ વિવિધ સ્થળોએ પાણી ભરાઈ જવાથી વાહનચાલકો અને રાહદારીઓને મુશ્કેલીનો સામનો કરવો પડી રહ્યો છે. ખોદેલા ખાડાઓ પણ જગ્યાએ છોડી દેવામાં આવ્યા છે. કેટલીક જગ્યાએ ખાડા ખોદ્યા બાદ સાવચેતીના બોર્ડ પણ મુકવામાં આવ્યા નથી. જેના કારણે રાહદારીઓ અને વાહન ચાલકોને ત્યાંથી પસાર થતી વખતે જોખમી પરિસ્થિતિનો સામનો કરવો પડે છે.
ડભોઈ વાઘોડિયા રિંગ રોડ પર SSV સ્કૂલ ડિવિઝન 2 પાસે ગઈકાલે રાત્રે એક રિક્ષા ખોદાયેલા ખાડામાં પડી હતી. રાત્રે થયેલા અકસ્માતને કારણે ચાલક રિક્ષાને ખાડામાં છોડીને બહાર આવી ગયો હતો. જે રીતે રિક્ષા ખાડામાં ફસાઈ છે તે જોઈને સ્પષ્ટ થાય છે કે રિક્ષા ચાલક અને તેમાં સવાર કોઈપણ મુસાફરને ઈજા થઈ હશે. સવારે રિક્ષાને ખાડામાં પડેલી જોઈને પસાર થતા લોકો એકઠા થઈ ગયા હતા અને રોષ વ્યક્ત કર્યો હતો.