ભારતીય સેનાના ચિનાર કોર્પ્સે શનિવારે જમ્મુ-કાશ્મીરના કુપવાડામાં 2 આતંકીઓને ઠાર કર્યા છે. આ અભિયાનને ઓપરેશન પિમ્પલ નામ આપવામાં આવ્યું હતું. આ રીતે, વિસ્તારમાં સુરક્ષા સુનિશ્ચિત કરવાના સતત પ્રયાસોમાં એક મહત્વપૂર્ણ સિદ્ધિ નોંધવામાં આવી હતી. ચિનાર કોર્પ્સે કહ્યું કે તેને કુપવાડાના કેરન સેક્ટરમાં ઘૂસણખોરીના પ્રયાસ અંગે એજન્સીઓ પાસેથી ઇનપુટ મળ્યા હતા. આ બાતમીના આધારે શુક્રવારે ઓપરેશન શરૂ કરવામાં આવ્યું હતું. સેનાએ ટ્વિટર પર લખ્યું, ‘સૈનિકોએ શંકાસ્પદ ગતિવિધિ જોઈને આતંકવાદીઓને રોકવા માટે કહ્યું, પરંતુ તેઓએ અંધાધૂંધ ગોળીબાર શરૂ કરી દીધો. જવાબમાં સુરક્ષા દળોએ બે આતંકવાદીઓને ઠાર કર્યા હતા.
ઓપરેશન પિમ્પલ શું છે?
ઓપરેશન પિમ્પલ એ ભારતીય સશસ્ત્ર દળો દ્વારા કુપવાડાના કેરન સેક્ટરમાં શરૂ કરાયેલ એક સુરક્ષા ઓપરેશન છે. આ સંયુક્ત ઓપરેશન 7 નવેમ્બરે આ વિસ્તારમાં શંકાસ્પદ પ્રવૃત્તિ ધ્યાનમાં આવ્યા બાદ શરૂ કરવામાં આવ્યું હતું. સતર્ક સૈનિકો દ્વારા પડકારવામાં આવતાં આતંકવાદીઓએ અંધાધૂંધ ગોળીબાર શરૂ કરી દીધો હતો. આવી સ્થિતિમાં એન્કાઉન્ટર શરૂ થયું અને 2 આતંકવાદીઓ માર્યા ગયા. વિસ્તારની શોધખોળ હજુ ચાલુ છે. સુરક્ષા સુનિશ્ચિત કરવા માટે ચિનાર કોર્પ્સ દ્વારા આ અભિયાન ચલાવવામાં આવી રહ્યું છે.
કિશ્તવાડમાં પણ આતંકીઓ સાથે એન્કાઉન્ટર
અગાઉ એવી માહિતી મળી હતી કે જમ્મુ-કાશ્મીરના કિશ્તવાડ જિલ્લાના જંગલ વિસ્તારમાં આતંકવાદીઓ છુપાયેલા છે. આતંકવાદીઓને પકડવા માટે કોર્ડન અને સર્ચ ઓપરેશન હાથ ધરવામાં આવ્યું હતું. ગાઢ જંગલ વિસ્તાર ચત્રુમાં આતંકવાદીઓ અને સુરક્ષા દળો વચ્ચેના એન્કાઉન્ટર બાદ બુધવારે ઓપરેશન શરૂ થયું હતું. આ અથડામણમાં એક જવાન ઘાયલ થયો હતો. સુરક્ષા અધિકારીએ કહ્યું, ‘આતંકવાદીઓને શોધવા માટે ઓપરેશન ચાલુ છે. જો કે, ફરીથી ગોળીબાર થયો ન હતો. ઓપરેશનમાં ડ્રોન અને સ્નિફર ડોગની પણ મદદ લેવામાં આવી રહી છે. ઘેરાબંધીને વધુ મજબૂત કરવા વધારાના દળો તૈનાત કરવામાં આવ્યા છે.
