ભારતીય ક્રિકેટ દિગ્ગજ વિરાટ કોહલી ફરી એકવાર ઇતિહાસ રચવાની નજીક છે. ન્યુઝીલેન્ડ સામેની આગામી વન-ડે શ્રેણીમાં કોહલી પાસે મહાન સચિન તેંડુલકરના વિશેષ વિશ્વ રેકોર્ડને પાર કરવાની સુવર્ણ તક હશે. હાલમાં, કોહલી અને તેંડુલકર બંને 34 અલગ-અલગ મેદાનો (સ્થળો) પર ODI સદી ફટકારવાનું ગૌરવ ધરાવે છે, જે વિશ્વમાં સૌથી વધુ છે. આ યાદીમાં, રોહિત શર્મા 26 સદી સાથે ત્રીજા સ્થાને છે, જ્યારે રિકી પોન્ટિંગ, હાશિમ અમલા અને એબી ડી વિલિયર્સ જેવા દિગ્ગજ 21-21 મેદાન પર સદી સાથે ઘણા પાછળ છે.
માત્ર 1 સદી અને સચિનનો રેકોર્ડ તૂટ્યો
આવતીકાલથી શરૂ થનારી ઘરઆંગણાની વનડે શ્રેણી કોહલી માટે એક સીમાચિહ્નરૂપ સાબિત થઈ શકે છે, કારણ કે તેને એવા મેદાન પર રમવાની તક મળશે જ્યાં તેણે અત્યાર સુધી સદી ફટકારી નથી. શ્રેણીની પ્રથમ મેચ વડોદરામાં રમાશે, જ્યાં રસપ્રદ વાત એ છે કે વિરાટે અત્યાર સુધી એક પણ વનડે મેચ રમી નથી. જો તે અહીં તેની પહેલી જ મેચમાં સદી ફટકારશે તો તે તેંડુલકરથી સીધો આગળ નીકળી જશે. શ્રેણીની બીજી મેચ રાજકોટમાં યોજાશે, જ્યાં કોહલીનો અગાઉનો સર્વોચ્ચ સ્કોર 78 રન છે, અને ત્રીજી મેચ ઈન્દોરમાં રમાશે, જ્યાં તેનો અત્યાર સુધીનો શ્રેષ્ઠ ODI સ્કોર 36 રન છે. જો કોહલી આ ત્રણમાંથી કોઈપણ એક મેદાન પર સદી ફટકારે છે, તો તે ODI ક્રિકેટમાં 35 અલગ-અલગ મેદાનો પર સદી ફટકારનાર વિશ્વનો એકમાત્ર ખેલાડી બની જશે.
કોહલીએ અલગ-અલગ મેદાન પર વર્ચસ્વ જમાવ્યું છે
ક્રિકેટના ઘણા મહાન ખેલાડીઓએ માત્ર અમુક પસંદગીના મેદાનો પર જ પ્રભુત્વ જમાવ્યું છે, ત્યારે કોહલીએ સાબિત કર્યું છે કે તે 34 અલગ-અલગ સ્થળોએ સદી ફટકારીને વિશ્વના કોઈપણ ખૂણામાં શાનદાર બેટિંગ કરી શકે છે. જો તે વડોદરા, ઈન્દોર કે રાજકોટના કોઈપણ મેદાન પર સદી ફટકારશે તો તે સૌથી વધુ મેદાન પર સદી ફટકારવાના સચિન તેંડુલકરના રેકોર્ડને તોડીને ટોચ પર રહેશે. ત્રણમાંથી કોઈપણ એક શહેરમાં સદી ફટકારવાથી તે ક્રિકેટ ઈતિહાસનો એકમાત્ર બેટ્સમેન બની જશે જેણે 35 અલગ-અલગ આંતરરાષ્ટ્રીય સ્ટેડિયમમાં સદી ફટકારી હોય. આવતીકાલથી શરૂ થનારી આ શ્રેણી પર ક્રિકેટપ્રેમીઓની નજર ટકેલી છે.
ODI સદી: સૌથી વધુ સ્થળો
• વિરાટ કોહલી: 34 મેદાન
• સચિન તેંડુલકર: 34 મેદાન
