લંડન. ભારત મહિલા T20 વર્લ્ડ કપ 2026માં સેમિફાઇનલની ટિકિટ મેળવવાથી ચૂકી ગયું છે. રવિવારે ‘વુમન ઇન બ્લુ’ ઓસ્ટ્રેલિયા સામેની છેલ્લી ગ્રુપ સ્ટેજની મેચમાં 6 વિકેટથી હારી ગઈ હતી. આ સાથે ભારતે અંતિમ-4માં પહોંચવાની તક ગુમાવી દીધી હતી. ઓસ્ટ્રેલિયા અને દક્ષિણ આફ્રિકાને ‘ગ્રુપ-એ’માંથી સેમીફાઈનલની ટિકિટ મળી ગઈ છે, જ્યારે ઈંગ્લેન્ડ અને વેસ્ટ ઈન્ડિઝને ‘ગ્રૂપ-બી’માંથી આગળના રાઉન્ડમાં પહોંચી ગયા છે. રવિવારે લોર્ડ્સમાં ટોસ જીતીને બેટિંગ કરવા આવેલી ભારતીય ટીમે 4 વિકેટ ગુમાવીને 170 રન બનાવ્યા હતા. સ્મૃતિ મંધાનાએ શેફાલી વર્મા સાથે પ્રથમ વિકેટ માટે 55 બોલમાં 66 રનની ભાગીદારી કરી હતી. શેફાલી 26 બોલમાં 2 છગ્ગા અને 3 ચોગ્ગાની મદદથી 34 રન બનાવીને આઉટ થઈ ગઈ હતી, ત્યારબાદ મંધાનાએ જેમિમાહ રોડ્રિગ્ઝ સાથે બીજી વિકેટ માટે 17 રન જોડ્યા હતા. મંધાનાએ 37 બોલમાં 6 ચોગ્ગાની મદદથી 38 રનની ઇનિંગ રમી હતી.
ભારતીય ટીમે 83ના સ્કોર સુધીમાં તેના બંને ઓપનરોની વિકેટ ગુમાવી દીધી હતી. અહીંથી કેપ્ટન હરમનપ્રીત કૌરે જેમિમાહ રોડ્રિગ્ઝ સાથે મળીને ત્રીજી વિકેટ માટે 45 બોલમાં 64 રનની ભાગીદારી કરીને ટીમને મજબૂત સ્થિતિમાં પહોંચાડી દીધી હતી.
જેમિમા 34ના સ્કોર પર રિટાયર આઉટ થઈ ગઈ, જ્યારે કેપ્ટન કૌરે 27 બોલમાં 3 સિક્સ અને 6 ફોરની મદદથી 56 રનની ઇનિંગ રમી. હરમનપ્રીતે 25 બોલમાં પોતાની અડધી સદી પૂરી કરી હતી, જેની સાથે તે ઓસ્ટ્રેલિયા સામે T20 ક્રિકેટમાં સૌથી ઝડપી અડધી સદી ફટકારનાર ત્રીજી બેટ્સમેન બની હતી. ઓસ્ટ્રેલિયા તરફથી કેપ્ટન સોફી મોલિનેક્સે 2 વિકેટ લીધી હતી.
જવાબમાં ઓસ્ટ્રેલિયાએ 19 ઓવરમાં મેચ જીતી લીધી હતી. ઓસ્ટ્રેલિયાએ માત્ર 4ના સ્કોર પર જ્યોર્જિયા વોલ (4)ની શરૂઆતની વિકેટ ગુમાવી હતી, પરંતુ આ પછી ફોબી લિચફિલ્ડે બેથ મૂની સાથે મળીને બીજી વિકેટ માટે 40 બોલમાં 50 રન જોડીને ટીમને સંભાળી લીધી હતી.
લિચફિલ્ડે 25 બોલમાં 3 બાઉન્ડ્રી વડે 24 રન બનાવ્યા હતા. થોડા સમય બાદ ઓસ્ટ્રેલિયાએ પણ 68 રનમાં બેથ મૂની (22)ની વિકેટ ગુમાવી દીધી હતી. અહીંથી એલિસ પેરીએ એશ્લે ગાર્ડનર સાથે મળીને ચોથી વિકેટ માટે 57 બોલમાં 100 રન બનાવીને ભારત પાસેથી મેચ છીનવી લીધી હતી. પેરીએ 38 બોલમાં 8 ચોગ્ગાની મદદથી 56 રન બનાવ્યા હતા જ્યારે ગાર્ડનરે 29 બોલમાં 3 છગ્ગા અને એટલા જ ચોગ્ગાની મદદથી અણનમ 53 રન બનાવ્યા હતા. ભારત તરફથી શ્રી ચારણીએ 2 વિકેટ લીધી હતી. દીપ્તિ શર્મા અને રેણુકા ઠાકુરે 1-1 વિકેટ લીધી હતી.
–IANS
આ પણ વાંચો – અખબાર પહેલા તમારા રાજ્ય/શહેરના સમાચાર વાંચવા માટે ક્લિક કરો.
