પાકિસ્તાનના ક્રેશ થયેલા કાર્ગો જહાજનો કાટમાળ મળી આવ્યો છે. પરંતુ હજુ પણ 5 લોકો ગુમ હોવાના અહેવાલ છે. સંયુક્ત આરબ અમીરાત (UAE)ના શારજાહથી કરાચી જઈ રહેલું પાકિસ્તાની કાર્ગો પ્લેન અકસ્માતનો શિકાર બન્યું હતું. એર ટ્રાફિક કંટ્રોલ (ATC) સાથે સંપર્ક ગુમાવ્યા બાદ ગુમ થયેલા K2 એરવેઝના આ બોઈંગ 737 વિમાનનો કાટમાળ બુધવારે અરબી સમુદ્રમાં મળી આવ્યો હતો. પાકિસ્તાન એરપોર્ટ ઓથોરિટીના જણાવ્યા અનુસાર, પ્લેનમાં સવાર 5 ક્રૂ મેમ્બર હજુ પણ ગુમ છે, તેમની શોધ માટે મોટા પાયે બચાવ અભિયાન ચલાવવામાં આવી રહ્યું છે.
કાટમાળ ક્યાંથી મળી આવ્યો હતો
લગભગ 12 કલાકના જંગી સર્ચ ઓપરેશન બાદ ઓરમારા બંદરથી 53 નોટિકલ માઈલ દક્ષિણમાં પ્લેનનો કાટમાળ મળી આવ્યો હતો. આ વિમાને મંગળવારે સાંજે શારજાહથી ઉડાન ભરી હતી. સંપર્ક તૂટી ગયો તે પહેલાં જ વિમાને નેવિગેશન સિસ્ટમમાં ખામી હોવાની જાણ કરી હતી. પાકિસ્તાન નેવી, એરફોર્સ અને નાગરિક બચાવ એજન્સીઓ સંયુક્ત રીતે દરિયામાં ગુમ થયેલા 5 લોકોની શોધ કરી રહી છે.
કેવી રીતે થયો અકસ્માત?
પાકિસ્તાન એરપોર્ટ ઓથોરિટીના જણાવ્યા અનુસાર, રડાર ડેટા દર્શાવે છે કે વિમાને અચાનક તેની દિશામાં મોટો ફેરફાર કર્યો અને પછી ઝડપથી નીચે પડવાનું શરૂ કર્યું. કરાચીથી લગભગ 155 નોટિકલ માઈલ પશ્ચિમમાં મંગળવારે સ્થાનિક સમય મુજબ રાત્રે લગભગ 9:21 વાગ્યે પ્લેન રેડિયો અને રડારનો સંપર્ક સંપૂર્ણપણે ગુમાવી બેઠો હતો.
બચાવ કામગીરીમાં કોણ કોણ સામેલ હતા?
દુર્ઘટનાની ચેતવણી મળતાની સાથે જ મોટા પાયે શોધ અને બચાવ કામગીરી શરૂ કરવામાં આવી હતી. અરબી સમુદ્રમાં ચલાવવામાં આવી રહેલા આ ઓપરેશનમાં પાકિસ્તાન નેવીના યુદ્ધ જહાજ ‘PNS ઝુલ્ફીકાર’, નેવલ સર્વેલન્સ એરક્રાફ્ટ, પાકિસ્તાન એરફોર્સના એરક્રાફ્ટ તેમજ વેપારી જહાજો પણ તૈનાત કરવામાં આવ્યા છે.
