ગાઝા, ઇઝરાયેલ અને હમાસ વચ્ચે લગભગ એક મહિનાથી યુદ્ધ ચાલી રહ્યું છે. અન્ય દેશો દ્વારા ઘણી વખત શાંતિ અને યુદ્ધવિરામના પ્રયાસો કરવામાં આવ્યા છે પરંતુ સફળતા મળી નથી. પરિણામ એ છે કે ઇઝરાયેલની સેના ગાઝા પટ્ટીમાં સતત ટેન્ક ચલાવી રહી છે અને મૃત્યુઆંકમાં વધારો કરી રહી છે. ઇઝરાયલી દળોએ ગાઝાના જબાલિયા શરણાર્થી કેમ્પ પર પણ હુમલો કર્યો છે, જેમાં 50થી વધુ લોકો માર્યા ગયા છે. દરમિયાન ઈઝરાયેલના હુમલાથી નારાજ અન્ય એક દેશે તેલ અવીવમાંથી પોતાના રાજદ્વારીને પરત બોલાવી લીધા છે. મોટી વાત એ છે કે આ દેશ અમેરિકાનો સાથી છે.
અમેરિકાના મુખ્ય સહયોગી જોર્ડને કહ્યું કે તેણે ઈઝરાયેલમાં તેના રાજદૂતને પાછા બોલાવ્યા છે અને ગાઝામાં માનવતાવાદી આપત્તિના વિરોધમાં ઈઝરાયેલના રાજદૂતને દેશની બહાર રહેવા કહ્યું છે. જોર્ડનના નાયબ વડા પ્રધાને જણાવ્યું હતું કે રાજદૂતોની વાપસી ઇઝરાયલ દ્વારા ગાઝા પરના તેના યુદ્ધને અટકાવવા અને તેના કારણે માનવતાવાદી વિનાશ સાથે જોડાયેલી છે. જોર્ડને 1994માં ઈઝરાયેલ સાથે શાંતિ કરાર પર હસ્તાક્ષર કર્યા હતા. 1979માં ઇજિપ્ત પછી 1994માં ઇઝરાયેલ સાથે શાંતિ સ્થાપનાર જોર્ડન બીજો આરબ દેશ બન્યો. ગાઝા પર ઈઝરાયેલના હુમલાને જોતા હજારો નાગરિકોએ જોર્ડની સરકાર પર ઈઝરાયેલ સાથે રાજદ્વારી સંબંધો તોડવા માટે દબાણ કર્યું હતું. જોર્ડન, જેની વસ્તી ઓછામાં ઓછી 50 ટકા પેલેસ્ટિનિયન હોવાનું માનવામાં આવે છે, તેણે ગાઝામાં યુદ્ધ અંગે ચિંતા વ્યક્ત કરી છે.
બોલિવિયાએ તાજેતરમાં કહ્યું હતું કે તેણે ગાઝા પટ્ટી પર હુમલાને કારણે ઇઝરાયેલ સાથે રાજદ્વારી સંબંધો તોડી નાખ્યા છે અને તેના રાજદ્વારીઓને પાછા બોલાવ્યા છે. પાડોશી દેશ કોલંબિયા અને ચિલીએ પણ ઈઝરાયેલમાં તેમના રાજદૂતોને પાછા બોલાવ્યા છે. દક્ષિણ અમેરિકાના ત્રણ દેશોએ ગાઝા પર ઈઝરાયેલના હુમલાની સખત નિંદા કરી છે અને પેલેસ્ટિનિયન નાગરિકોના મોત પર ચિંતા વ્યક્ત કરી છે. તુર્કીએ ઈઝરાયેલમાંથી પોતાના રાજદૂતને પહેલા જ પરત બોલાવી લીધું છે.લેટિન અમેરિકન દેશ બોલિવિયાએ ઈઝરાયેલને યુદ્ધવિરામની અપીલ કરી હતી અને ગાઝામાં માનવતાવાદી સહાય મોકલવા કહ્યું હતું. આ પહેલા પણ બોલિવિયાએ ગાઝા પટ્ટીને લઈને ઈઝરાયેલ સાથે સંબંધો તોડી નાખ્યા હતા.