ગાંધીનગર RTOમાં ડ્રાઇવિંગ ટેસ્ટ કૌભાંડનો પર્દાફાશ થયો છે. તપાસમાં બહાર આવ્યું છે કે આરટીઓ ઇન્સપેક્ટર જયદીપસિંહ ઝાલાએ એઆરટીઓના ઇન્ચાર્જ તરીકે સોફ્ટવેરમાં છેડછાડ કરી ડ્રાઇવિંગ ટેસ્ટ વિના લાયસન્સ ઇશ્યુ કર્યું હતું. ગાંધીનગરના કેટલાક એજન્ટો સાથે તેની સાંઠગાંઠ હોવાનું જાણવા મળ્યું છે. તેના મોબાઈલ ફોનની તપાસમાં અનેક એજન્ટોની માહિતી મળી છે. હાલમાં સાયબર ક્રાઈમ દ્વારા આરટીઓ ઈન્સ્પેક્ટર જયદીપસિંહ ઝાલા, સમીર રતંધરીયા અને ગાંધીનગર આરટીઓ એજન્ટ ભાવેન શાહની ધરપકડ કરીને કાર્યવાહી હાથ ધરવામાં આવી છે.
ગાંધીનગર આરટીઓમાં ડ્રાઇવિંગ ટેસ્ટ વગર સારથી એપ્લિકેશનમાં પાસ બતાવીને કૌભાંડ આચરવામાં આવતા અમદાવાદ આરટીઓ કચેરીના અધિકારીએ સાયબર ક્રાઇમમાં ફરિયાદ નોંધાવી હતી. જે બાદ સાયબર ક્રાઈમ દ્વારા તપાસ શરૂ કરવામાં આવી હતી.
સાયબર ક્રાઈમની તપાસમાં જાણવા મળ્યું કે વર્ષ 2022માં ગાંધીનગર આરટીઓના આરટીઓ ઈન્સ્પેક્ટર જયદીપસિંહ ઝાલા ઈન્ચાર્જ એઆરટીઓ હતા. આ દરમિયાન તેણે પોતાની સત્તાનો દુરુપયોગ કરીને આખું કૌભાંડ કર્યું. તેણે અમદાવાદ અને ગાંધીનગરમાં ડ્રાઇવિંગ ટેસ્ટમાં કૌભાંડ કર્યું છે. ડ્રાઇવિંગ ટેસ્ટ વિના સોફ્ટવેર સાથે ચેડા કરીને આ કૌભાંડ આચરવામાં આવ્યું હતું.
તેની ગાંધીનગરના કેટલાક એજન્ટો સાથે મિલીભગત હોવાનું તપાસમાં બહાર આવ્યું છે. હાલ આરટીઓ ઇન્સ્પેક્ટર જયદીપસિંહ ઝાલા, સમીર રતંધરિયા અને એજન્ટ ભાવેન શાહની ધરપકડ કરવામાં આવી છે. આ તમામની પૂછપરછમાં અન્ય એજન્ટોના નામ સામે આવી શકે છે.