બંગાળની ખાડીમાં લો પ્રેશરને કારણે વરસાદ વધશે, સૌરાષ્ટ્રમાં યલો એલર્ટ
અમદાવાદઃ
ગુજરાત રાજ્યમાં ચોમાસાનો ત્રીજો તબક્કો જોરદાર રીતે શરૂ થયો છે. હવામાન વિભાગે આજથી 5 દિવસ સુધી રાજ્યના અનેક વિસ્તારોમાં ભારેથી અતિભારે વરસાદની આગાહી કરી છે. સૌરાષ્ટ્ર અને દક્ષિણ ગુજરાતના કેટલાક વિસ્તારોમાં ઓરેન્જ એલર્ટ આપવામાં આવ્યું છે.
બુધવારે સુરત, ભરૂચ, ગીર સોમનાથ, જૂનાગઢ અને અમરેલીમાં ઓરેન્જ એલર્ટ આપવામાં આવ્યું છે. જો કે મંગળવારે ધોરાજીમાં વરસાદે તારાજી સર્જી હતી. અવિરત વરસાદને કારણે હાઈવેના મુખ્ય રસ્તાઓ નદીઓમાં ફેરવાઈ ગયા હતા.
19મી જુલાઈથી 21મી જુલાઈ સુધી સૌરાષ્ટ્રના ભાવનગર, અમરેલી અને દક્ષિણ ગુજરાતના વાપી, સુરત, ભરૂચ, વલસાડ જિલ્લામાં ભારેથી અતિભારે વરસાદ પડ્યો હતો. બંગાળની ખાડી પર લો પ્રેશર સિસ્ટમ સક્રિય બની છે. જે પાંચ દિવસ સક્રિય રહેશે. અમદાવાદ જિલ્લા સહિત રાજ્યમાં સતત આઠ દિવસ સુધી વરસાદ પડશે કારણ કે ચોમાસાની ટ્રફ અને સાયક્લોનિક સરક્યુલેશન જેવી પાંચ મોટી અને નાની સિસ્ટમ સક્રિય થઈ છે.
હવામાનશાસ્ત્રી અંકિત પટેલના જણાવ્યા અનુસાર બંગાળની ખાડીમાં વરસાદી સિસ્ટમ સક્રિય થઈ છે. જેના કારણે સુરત, નવસારી, ડાંગમાં ભારેથી અતિભારે વરસાદ પડી શકે છે. બુધવારથી 24 કલાક દરમિયાન ગીર સોમનાથ, જૂનાગઢ અને અમરેલીમાં ભારે વરસાદની આગાહી કરવામાં આવી છે.