જામનગર.
જામનગર જિલ્લાના ફલા ગામમાં આજે હત્યાની ઘટના સામે આવતાં ખળભળાટ મચી ગયો છે. સૌરાષ્ટ્ર ગ્રામીણ બેંકના કર્મચારીએ બેંક પરિસરમાં પિતા-પુત્ર પર કોઈ કારણસર જીવલેણ હુમલો કરતા પિતાનું ઘટનાસ્થળે જ મોત નીપજ્યું હતું, જ્યારે પુત્રને ગંભીર ઈજા થતાં તેને સારવાર માટે જામનગર રીફર કરવામાં આવ્યો છે. આ બનાવની જાણ થતા જ પોલીસ કાફલો ઘટના સ્થળે પહોંચી કાયદેસરની કાર્યવાહી હાથ ધરી હતી.
આ અંગે પ્રાપ્ત વિગતો મુજબ રાજકોટ-જામનગર હાઈવે પર આવેલા ફલા ગામે સૌરાષ્ટ્ર ગ્રામીણ બેંકની શાખા આવેલી છે. જેમાં ફરજ પર રહેલા ધવલ પટેલે ગોવિંદભાઈ ઘંટીયા (60) અને તેના પુત્ર મિલન (36) પર અંગત કારણોસર છરી વડે હુમલો કર્યો હતો.
આ ઘટનામાં પિતા ગોવિંદભાઈનું ઘટનાસ્થળે જ મોત નીપજ્યું હતું, જ્યારે બંને ગંભીર રીતે ઘાયલ થયા હતા. તેમના પુત્ર મિલનને સારવાર માટે જામનગરની હોસ્પિટલમાં ખસેડવામાં આવ્યો છે.
પ્રાથમિક તપાસમાં મૃતકની પુત્રવધૂ પણ સૌરાષ્ટ્ર ગ્રામીણ બેંકમાં નોકરી કરતી હતી જેની આરોપી ધવલ પટેલ દ્વારા છેડતી કરવામાં આવી હતી. આથી સાથીદાર મહિલાના સસરા અને પતિ ધવલ પટેલને ઠપકો આપવા બેંકમાં આવ્યો હતો. દરમિયાન બોલાચાલી ઉગ્ર બનતાં ધવલ પટેલે પોતાની પાસે રહેલી છરી વડે પોતાને ઇજા પહોંચાડી હતી. હાલ પોલીસે આ મામલે વધુ તપાસ હાથ ધરી છે.