આજે જિલ્લા ભૂસ્તર વિભાગની ટીમે બનાસકાંઠા જિલ્લાના ડીસામાંથી ગેરકાયદેસર રેતી ભરેલા બે ડમ્પરોને પકડી પાડી ડમ્પર સહિત 60 લાખનો માલસામાન જપ્ત કરી ડમ્પર માલિકો સામે દંડાત્મક કાર્યવાહી શરૂ કરી છે. લાંબા સમયથી ડીસા સહિત સમગ્ર બનાસકાંઠા જિલ્લામાં ગેરકાયદેસર ખનન થતું હોવાની ફરિયાદો મળી રહી છે. આ પછી જિલ્લા ભૂસ્તરશાસ્ત્રી ગુરપ્રીત સિંઘની સૂચનાથી માઇન્સ સુપરવાઇઝર જય પટેલ સહિતની ટીમે ખાનગી રાહે તપાસ શરૂ કરી હતી. દરમિયાન આજે સવારે ભૂસ્તર વિભાગની ટીમે ઓચિંતી તપાસ હાથ ધરી હતી ત્યારે ડીસાના કંસારી તરફથી બે ડમ્પર શંકાસ્પદ હાલતમાં જઈ રહ્યા હતા. આવી સ્થિતિમાં અધિકારીઓએ શંકાસ્પદ ડમ્પરને અટકાવીને તલાશી લેતા તે ગેરકાયદેસર રેતી ભરેલ હોવાનું જણાયું હતું. આથી ખાણ ખનીજ વિભાગની ટીમે 60 લાખની કિંમતના રેતી ભરેલા બે ડમ્પર જપ્ત કરી ડમ્પર માલિકો સામે દંડ વસૂલવા સહિતની કાયદેસરની કાર્યવાહી હાથ ધરી છે. ઉલ્લેખનીય છે કે, હાલમાં બનાસ નદીમાં દાંતીવાડા ડેમમાંથી પાણી છોડવામાં આવ્યું છે. જેથી તંત્રએ તમામ લીઝ ધારકોને થોડા દિવસો માટે લીઝ બંધ કરવાનો આદેશ કર્યો છે. જો કે કેટલાક લીઝ ધારકોએ આદેશ છતાં લીઝ ચાલુ રાખી હતી. લીઝમાંથી ગેરકાયદેસર રીતે રેતીનું વહન કરતા ડમ્પર ચાલકો સામે ખાણ ખનીજ વિભાગ દ્વારા કાર્યવાહી કરવામાં આવી રહી છે.