ડીસાના ટીસીડી ગ્રાઉન્ડમાં સ્પોર્ટ્સ કોમ્પ્લેક્સ બનાવવાની જાહેરાત થતાં જ ખેલાડીઓએ વિરોધ શરૂ કર્યો હતો. સ્પોર્ટસ ગ્રાઉન્ડ સંકુલ બનાવવામાં આવે તો વિવિધ રમતો રમતા સ્થાનિક ખેલાડીઓનું મેદાન કપાઇ જશે, જેથી સ્પોર્ટસ કોમ્પ્લેક્ષ અન્યત્ર બનાવવા સબ કલેકટરને આવેદનપત્ર આપી રજૂઆત કરી હતી. ડીસામાં TCD ગ્રાઉન્ડમાં સ્પોર્ટ્સ કોમ્પ્લેક્સ બનાવવાની સરકારે જાહેરાત કરી છે. આમ તો સ્પોર્ટ્સ કોમ્પ્લેક્સનું બાંધકામ તમામ લોકો માટે સારું છે પરંતુ ડીસાના ખેલાડીઓએ આ સંકુલનો વિરોધ કર્યો છે કારણ કે ડીસાના ગરીબ, મધ્યમ અને સ્થાનિક લોકો છેલ્લા કેટલાક સમયથી ટીસીડીના ખુલ્લા મેદાનમાં ક્રિકેટ સહિતની વિવિધ રમતો રમી રહ્યા છે. 25 વર્ષ આ મેદાન સવારના સમયે ખેલાડીઓથી ભરેલું હોય છે, પરંતુ હવે જો સ્પોર્ટ્સ કોમ્પ્લેક્સ બનાવવામાં આવે તો તેમનું મેદાન કપાઈ જવાની શક્યતા છે. જે માટે આજે આ તમામ રમતવીરોએ ડીસાના ડેપ્યુટી કલેક્ટર નેહા પંચાલને આવેદનપત્ર પાઠવી સ્પોર્ટ્સ કોમ્પ્લેક્સ બીજે ક્યાંક બનાવવું જોઈએ તેવું સૂચન કર્યું હતું. ડીસાનું આ એકમાત્ર TCD મેદાન છે જ્યાં ગરીબ અને મધ્યમ વર્ગના લોકો પૈસા વગર રમી શકે છે. જ્યાં લોકો ક્રિકેટ સહિત અનેક પ્રકારની રમતો રમે છે પરંતુ હવે જો સરકાર ત્યાં સ્પોર્ટ્સ કોમ્પ્લેક્સ બનાવે તો તેમની ક્રિકેટ રમવાની જગ્યા ખતમ થઈ શકે છે. જેના માટે તેઓએ માંગણી કરી છે કે સ્પોર્ટ્સ કોમ્પ્લેક્સ એવી રીતે બનાવવું જોઈએ કે તેની જગ્યા કપાઈ ન જાય.