ડીસાના નગર અને તાલુકામાં ભારતની આઝાદીના 77મા વર્ષની ઉત્સાહભેર ઉજવણી કરવામાં આવી હતી. ડીસાના કાંટ ગામે સ્વાતંત્ર્ય પર્વનો તાલુકા કક્ષાનો કાર્યક્રમ યોજાયો હતો. નાયબ કલેકટરના હસ્તે ધ્વજ ફરકાવવામાં આવ્યો હતો. જ્યારે ડીસા શહેર કક્ષાનો ધ્વજવંદન કાર્યક્રમ ગાંધી ચોક ખાતે યોજાયો હતો. જ્યાં નગરપાલિકા પ્રમુખના હસ્તે ત્રિરંગો લહેરાવવામાં આવ્યો હતો.સ્વતંત્રતા પર્વની 77મી વર્ષગાંઠ નિમિત્તે ડીસામાં સર્વત્ર દેશભક્તિનો માહોલ જોવા મળ્યો હતો. ડીસાના કાટ ગામની પ્રાથમિક શાળામાં ડીસા તાલુકા કક્ષાનો ધ્વજવંદન સમારોહ યોજાયો હતો, જેમાં નાયબ કલેકટર નેહાબેન પંચાલે ધ્વજ ફરકાવ્યો હતો. જેમાં સમગ્ર તાલુકાના અધિકારીઓ, રાજકીય અને સામાજિક આગેવાનો ઉપસ્થિત રહી રાષ્ટ્રગીત ગાઈને ત્રિરંગા ધ્વજને સલામી આપી હતી. શાળાની કન્યાઓએ સ્વાગત ગીત, પ્રકૃતિ નૃત્ય અને દેશભક્તિના કાર્યક્રમો રજૂ કર્યા હતા. નાયબ કલેકટરે તેમના વક્તવ્યમાં ડીસામાં સરકાર દ્વારા કરાયેલા વિકાસના કામોનો ચિતાર રજૂ કર્યો હતો. બીજી તરફ ડીસા નગરપાલિકા દ્વારા શહેરના ઐતિહાસિક ગાંધી ચોક ખાતે શહેરી કક્ષાનો કાર્યક્રમ યોજવામાં આવ્યો હતો. જેમાં ડીસા નગરપાલિકા પ્રમુખ રાજુભાઈ ઠક્કરના હસ્તે તિરંગો લહેરાવવામાં આવ્યો હતો. નગરપાલિકા પ્રમુખ રાજુભાઇ ઠક્કરે શહેરના વિકાસમાં સહકાર આપનાર તમામ નાગરિકોનો આભાર વ્યક્ત કરતાં જણાવ્યું હતું કે, 42 કરોડના ખર્ચે ચોથા તબક્કાની ભૂગર્ભ ગટરલાઇન, અદ્યતન ટાઉન હોલ બનાવવાની મંજુરી આપવામાં આવી છે. રૂ.15 કરોડ અને રૂ.2 કરોડના ખર્ચે પાલિકાનું નવું બિલ્ડીંગ. નગરપાલિકાની શિક્ષણ સમિતિના ચેરમેન વાસુભાઈ મોઢાએ SCW શાળામાં ધ્વજવંદન કર્યું હતું. આ સાથે જ APMCના ચેરમેન ગોવાભાઈ દેસાઈએ ડીસા શાકમાર્કેટ ખાતે ત્રિરંગો ધ્વજ ફરકાવ્યો હતો.