સોમવારે રશિયાના કુર્સ્ક વિસ્તારમાં બે રશિયન ફાઈટર પ્લેન અથડાયા હતા. રશિયન સૈન્ય ઉડ્ડયન સાથે જોડાયેલા એક સૂત્રએ જણાવ્યું કે કુર્સ્ક ક્ષેત્રમાં બે રશિયન Su-35S ફાઈટર પ્લેન હવામાં અથડાયા હતા. અકસ્માતનું કારણ હજુ સ્પષ્ટ થયું નથી. દુર્ઘટના બાદ બંને પ્લેનના પાયલોટનો પત્તો લાગ્યો નથી.
Su-35S એરક્રાફ્ટનો ઉપયોગ રશિયન સૈન્ય દ્વારા યુક્રેનિયન ડ્રોન અને મિસાઇલોને અટકાવવા તેમજ યુક્રેનિયન લશ્કરી હવાઈ સંરક્ષણ પ્રણાલીઓનો સામનો કરવા માટે કરવામાં આવે છે.
આ ઘટના એવા સમયે બની છે જ્યારે રશિયાના રાષ્ટ્રપતિ વ્લાદિમીર પુતિને શનિવારે મધરાતથી 72 કલાક માટે યુક્રેનમાં હુમલા રોકવાનો આદેશ આપ્યો હતો.
ત્રણ દિવસ માટે હુમલા પર પ્રતિબંધ
રશિયાના રાષ્ટ્રપતિના પ્રવક્તા દિમિત્રી પેસ્કોવે કહ્યું કે રાષ્ટ્રપતિ પુતિને શનિવારની મધ્યરાત્રિથી ત્રણ દિવસ માટે કિવ પર હુમલા રોકવાનો આદેશ આપ્યો છે. તેમણે કહ્યું કે આ નિર્ણય અમેરિકા સાથેની વાતચીતથી સંબંધિત છે, જેના માટે તૈયારીઓ કરવામાં આવી રહી છે અને આ વાતચીત કિવમાં થવાની છે.
તે જ સમયે, યુક્રેનિયન મીડિયા અનુસાર, રશિયાએ તાજેતરમાં યુક્રેનમાં કેટલીક મહત્વપૂર્ણ ઇમારતોને નિશાન બનાવીને હુમલા કર્યા હતા. રિપોર્ટમાં દાવો કરવામાં આવ્યો છે કે રશિયન ડ્રોને કિવમાં યુક્રેનની સુરક્ષા સેવાની મુખ્ય ઇમારત અને શહેરના અન્ય વિસ્તારમાં સમાન વિભાગની અન્ય ઇમારતને નિશાન બનાવી હતી.
બ્રિટિશ વડા પ્રધાને ટ્રમ્પ સાથે વાત કરી
ડાઉનિંગ સ્ટ્રીટ અનુસાર, સોમવારે બ્રિટિશ વડા પ્રધાન એન્ડી બર્નહામે અમેરિકી રાષ્ટ્રપતિ ડોનાલ્ડ ટ્રમ્પ સાથે વાત કરી હતી. બંને નેતાઓ યુક્રેનમાં વધુ જાનમાલના નુકસાનને રોકવા માટે યુદ્ધવિરામ તરફના પ્રયાસો ચાલુ રાખવા સંમત થયા હતા.
બ્રિટિશ વડા પ્રધાન કાર્યાલયના પ્રવક્તાએ જણાવ્યું હતું કે બંને નેતાઓ વધુ મૃત્યુને રોકવા માટે યુક્રેનમાં યુદ્ધવિરામ હાંસલ કરવાના પ્રયાસો ચાલુ રાખવાની જરૂરિયાત પર સંમત થયા હતા. વડા પ્રધાને યુક્રેન માટે બ્રિટનના સમર્થન તેમજ યુએસની આગેવાની હેઠળ તાજેતરની શાંતિ વાટાઘાટોનો પણ પુનરોચ્ચાર કર્યો હતો.
આ પણ વાંચો – 9/11 હુમલાને લઈને નવો ખુલાસો, અમેરિકાનો બેસ્ટ ફ્રેન્ડ નીકળ્યો અલ કાયદાના આતંકીનો મદદગાર, FBIએ છુપાવ્યું સત્ય?
