નવી દિલ્હી: ભારત અને યુએસ ટેક્નોલોજી ભાગીદારી વધારવા, સેમિકન્ડક્ટર્સ, 5G અને 6G ટેલિકોમ્યુનિકેશન નેટવર્ક્સ, ક્વોન્ટમ અને એડવાન્સ્ડ કમ્પ્યુટિંગના ક્ષેત્રોમાં સંયુક્ત રીતે ઉત્પાદનની શક્યતાઓ શોધવાનો પ્રયાસ કરશે, એમ શુક્રવારે જારી કરાયેલા સંયુક્ત નિવેદનમાં જણાવાયું હતું. વડા પ્રધાન નરેન્દ્ર મોદી અને અમેરિકી રાષ્ટ્રપતિ જો બિડેન વચ્ચે વોશિંગ્ટનમાં 22 જૂને થયેલી મુલાકાત બાદ આ નિવેદન બહાર પાડવામાં આવ્યું હતું. નિવેદનમાં જણાવાયું છે કે બંને સરકારો ટેક્નોલોજી ભાગીદારી વધારવા, સંયુક્ત વિકાસ અને ઉત્પાદનની તકોને પ્રોત્સાહન આપવા અને નિયમોને શ્રેષ્ઠ બનાવવા માટે સંકલ્પબદ્ધ છે.
ભારત અને યુએસએ પરસ્પર વાણિજ્ય, ટેક્નોલોજી ટ્રાન્સફર, સેમિકન્ડક્ટર, 5G અને 6G ટેલિકોમ્યુનિકેશન્સ અને ઓપન સોર્સ આધારિત ટેલિકોમ્યુનિકેશન નેટવર્ક, ક્વોન્ટમ અને એડવાન્સ્ડ કમ્પ્યુટિંગના ક્ષેત્રોમાં ટેક્નોલોજીના સંયુક્ત વિકાસને પ્રોત્સાહન આપવા માટે ઘણા કરારો પર હસ્તાક્ષર કર્યા છે. સંયુક્ત નિવેદનમાં કહેવામાં આવ્યું છે કે, “રાષ્ટ્રપતિ બિડેન અને વડા પ્રધાન મોદીએ સેમિકન્ડક્ટર સપ્લાય ચેઇન અને ઇનોવેશન પાર્ટનરશિપ માટે સમજૂતી કરાર પર હસ્તાક્ષરને બંને દેશોના સેમિકન્ડક્ટર પ્રમોશન પ્રોગ્રામના સંકલનમાં એક મહત્વપૂર્ણ પગલું ગણાવ્યું હતું.” આનાથી વ્યવસાયની તકો, સંશોધન, પ્રતિભા અને કૌશલ્ય વિકાસને વેગ મળશે.
બંને નેતાઓએ કોમ્પ્યુટર મેમરી ચિપ નિર્માતા માઈક્રોન ટેક્નોલોજીની જાહેરાતનું સ્વાગત કર્યું. માઈક્રોન તેની સેમિકન્ડક્ટર એસેમ્બલી અને ટેસ્ટિંગ ફેસિલિટી ગુજરાતમાં $2.75 બિલિયન (રૂ. 22,540 કરોડ)ના કુલ રોકાણ સાથે સ્થાપશે. નિવેદનમાં કહેવામાં આવ્યું છે કે, “બંને નેતાઓએ ભારતમાં સેમિકન્ડક્ટર શિક્ષણ અને વર્કફોર્સ ડેવલપમેન્ટને વેગ આપવા માટે 60,000 ભારતીય એન્જિનિયરોને તાલીમ આપવાના લેમ રિસર્ચના પ્રસ્તાવને આવકાર્યો હતો.” તેઓએ સહયોગી ઈજનેરી કેન્દ્ર સ્થાપવા માટે US$ 400 મિલિયનનું રોકાણ કરવાની એપ્લાઈડ મટીરીયલ્સ ઈન્ક.ની જાહેરાતનું પણ સ્વાગત કર્યું.