ગાંધીનગર: PM નરેન્દ્ર મોદીનું આજે રાત્રે અમદાવાદ એરપોર્ટ પર આગમન થતાં રાજ્યપાલ આચાર્ય દેવવ્રત અને મુખ્યમંત્રી ભૂપેન્દ્ર પટેલે તેમનું સ્વાગત કર્યું હતું. ત્યારે આજે 9 જાન્યુઆરીએ વડાપ્રધાન સવારે 9:30 કલાકે ગાંધીનગરના મહાત્મા મંદિર પહોંચશે.
અહીં તેઓ વિશ્વના નેતાઓ સાથે દ્વિપક્ષીય બેઠકો કરશે અને ત્યારબાદ ટોચની વૈશ્વિક કંપનીઓના સીઈઓ સાથે બેઠક કરશે. તેઓ બપોરે 3 વાગ્યે વાઈબ્રન્ટ ગુજરાત ગ્લોબલ ટ્રેડ શોનું પણ ઉદ્ઘાટન કરશે. આ વર્ષની સમિટની થીમ ‘ગેટવે ટુ ધ ફ્યુચર’ છે. વડાપ્રધાન નરેન્દ્ર મોદી અને UAEના રાષ્ટ્રપતિ પણ વાઈબ્રન્ટ ગુજરાત સમિટમાં ભાગ લેશે.
વડાપ્રધાન 10 જાન્યુઆરીના રોજ સવારે 9:45 કલાકે ગાંધીનગરના મહાત્મા મંદિર ખાતે વાઇબ્રન્ટ ગુજરાત ગ્લોબલ સમિટ 2024નું ઉદ્ઘાટન કરશે. આ પછી તે ટોચની વૈશ્વિક કંપનીઓના સીઈઓ સાથે બેઠક કરશે. વડાપ્રધાન ત્યારબાદ ગિફ્ટ સિટીની મુલાકાત લેશે, જ્યાં લગભગ 5:15 વાગ્યે તેઓ ગ્લોબલ ફિનટેક લીડરશિપ ફોરમમાં મુખ્ય બિઝનેસ લીડર્સ સાથે વાર્તાલાપ કરશે.
વર્ષ 2003માં તત્કાલિન મુખ્યમંત્રી નરેન્દ્ર મોદીના દૂરંદેશી નેતૃત્વ હેઠળ આયોજિત, વાઈબ્રન્ટ ગુજરાત ગ્લોબલ સમિટ આજે સર્વસમાવેશક વૃદ્ધિ અને ટકાઉ વિકાસ માટે વ્યાવસાયિક જોડાણ, જ્ઞાનની વહેંચણી અને વ્યૂહાત્મક ભાગીદારી માટેનું સૌથી પ્રતિષ્ઠિત વૈશ્વિક મંચ બની ગયું છે. વાઈબ્રન્ટ ગુજરાત ગ્લોબલ સમિટની દસમી આવૃત્તિ 10 થી 12 જાન્યુઆરી, 2024 દરમિયાન ગુજરાતના ગાંધીનગરમાં યોજાઈ રહી છે. તેની થીમ ‘ગેટવે ટુ ધ ફ્યુચર’ છે. સમિટની આ દસમી આવૃત્તિ વાઇબ્રન્ટ ગુજરાતને સફળતાના શિખર તરીકે ઉજવશે.
આ વર્ષની સમિટ માટે 34 ભાગીદાર દેશો અને 16 ભાગીદાર સંગઠનો છે. ઉપરાંત, ઉત્તર પૂર્વીય ક્ષેત્રના વિકાસ મંત્રાલય વાઇબ્રન્ટ ગુજરાત પ્લેટફોર્મનો ઉપયોગ ઉત્તર પૂર્વીય પ્રદેશોમાં રોકાણની તકો દર્શાવવા માટે કરશે.
આ સમિટમાં ઇન્ડસ્ટ્રી 4.0, ટેક્નોલોજી અને ઇનોવેશન, સસ્ટેનેબલ મેન્યુફેક્ચરિંગ, ગ્રીન હાઇડ્રોજન, ઇલેક્ટ્રિક મોબિલિટી અને રિન્યુએબલ એનર્જી અને સસ્ટેનેબિલિટી તરફ સંક્રમણ જેવા વૈશ્વિક સ્તરે પ્રસ્તુત વિષયો પર સેમિનાર અને કોન્ફરન્સ સહિત વિવિધ ઇવેન્ટ્સ યોજાશે.
વાઈબ્રન્ટ ગુજરાત ગ્લોબલ ટ્રેડ શોમાં કંપનીઓ વિશ્વ કક્ષાની અત્યાધુનિક ટેકનોલોજી સાથે બનેલી પ્રોડક્ટ્સનું પ્રદર્શન કરશે. ટ્રેડ શોમાં કેન્દ્રના કેટલાક ક્ષેત્રો જેમ કે ઈ-મોબિલિટી, સ્ટાર્ટ-અપ્સ, MSME, બ્લુ ઈકોનોમી, ગ્રીન એનર્જી અને સ્માર્ટ ઈન્ફ્રાસ્ટ્રક્ચર આવરી લેવામાં આવ્યા છે.