સ્થાનિક ડેસ્ક: ગેંગસ્ટર કિરણ પટેલ અને તેની પત્ની માલિની પટેલ વિરુદ્ધ વધુ એક પોલીસ ફરિયાદ દાખલ કરવામાં આવી છે. મોરબીના એક વેપારીએ કારખાનું સ્થાપવા માટે જીપીસીબી પાસેથી લાયસન્સ લેવું પડ્યું હતું. ત્યારે કિરણ પટેલ અને તેની પત્ની માલિનીએ વહેલી તકે જીપીસીબીમાંથી લાયસન્સ કઢાવવાનું કહીને વેપારી પાસેથી રૂ.42.48 લાખ લીધા હતા. જોકે, વેપારીએ લાઇસન્સ ન મળતાં અને પૈસા પાછા માગતાં પતિ-પત્નીએ રૂ.11.75 લાખ ચૂકવ્યા હતા. બાકીના રૂ.31.11 લાખ ન ચૂકવી છેતરપિંડી કરી હતી.
મોરબીના જોધપુર ગામમાં રહેતા ભરત પટેલ છેલ્લા અઢી વર્ષથી બીએન બ્રધર્સ નામની સિરામિક મશીનરી બનાવવાના કારખાનામાં વ્યવસાય કરે છે. મોરબીમાં બાયોટિક લાઈફ સાયન્સ પ્રાઈવેટ લિમિટેડ નામની કેમિકલ ફેક્ટરીમાં સ્લીપિંગ પાર્ટનર પણ છે. ગત વર્ષ 2017માં ભરતભાઈએ કિરણ પટેલનો સંપર્ક કર્યો હતો. ત્યારે ખુદ કિરણ પટેલે ભરતભાઈને કહ્યું હતું કે તેઓ ક્લાસ વન ઓફિસર છે અને સરકારમાં સારો પ્રભાવ ધરાવે છે.
જેથી ભરતભાઈએ કિરણ પટેલને જણાવ્યું કે તેઓ બાયોટેક લાઈફ સાયન્સ પ્રાઈવેટ લિમિટેડ નામની કંપની શરૂ કરવા માંગે છે અને લાઈસન્સ મેળવવાની પ્રક્રિયા જીપીસીબી બોર્ડમાં કરવામાં આવશે જેથી વહેલી તકે લાઇસન્સ મળી જાય. જેથી કિરણ પટેલે ભરતભાઈને સોલા એચસીજી હોસ્પિટલમાં મળવા બોલાવ્યા હતા. જ્યાં તેની પત્ની માલિની પટેલ અને કિરણ પટેલે લાયસન્સની તમામ પ્રક્રિયા અને ફી સહિત કુલ 40 થી 45 લાખ રૂપિયા માંગ્યા હતા. જેથી ભરતભાઈએ કિરણ અને તેની પત્નીને રૂ.42.86 લાખ રોકડા આપ્યા હતા. બાકીના પૈસા બે મહિના પછી આપવા જણાવ્યું હતું. 8 મહિના પછી પણ ભરતભાઈએ કિરણ પટેલ અને તેમની પત્ની માલિની પટેલને ફોન કર્યો હતો, પરંતુ કોઈએ ફોન ઉપાડ્યો નહોતો. તેથી જ્યારે ભરતભાઈએ જીપીસીબી બોર્ડમાં તપાસ કરી ત્યારે તેમને જાણવા મળ્યું કે કિરણ કે માલિનીએ કોઈ અરજી કરી ન હતી. જેથી કિરણ પટેલ અને તેની પત્નીને પૈસા પરત કરવાનું કહેતાં તેઓએ રૂ.11.75 લાખ પરત કરી દીધા હતા અને બાકીના રૂ.31.11 લાખ પરત ન આપી ભરતભાઇ સાથે છેતરપિંડી કરી હતી. આ મામલે સોલા પોલીસે ભરતભાઈની ફરિયાદના આધારે કિરણ પટેલ અને તેની પત્ની માલિની પટેલ સામે ગુનો નોંધી વધુ તપાસ હાથ ધરી છે.