અમદાવાદ પોલીસ હવે એક સાથે બે હત્યા પાછળના ગુનેગારને શોધવા સક્રિય બની છે.
(GNS) અમદાવાદ, તા.01
સ્માર્ટ સિટી અમદાવાદ હવે સુરક્ષિત નથી. અમદાવાદમાં દિવસેને દિવસે અકસ્માતો, હત્યા અને હિંસાના બનાવો વધી રહ્યા છે. ગઈકાલે અમદાવાદ શહેરના સૌથી લોકપ્રિય પિકનિક સ્પોટ સાબરમતી રિવરફ્રન્ટ પર ફાયરિંગના કારણે ભારે હોબાળો મચી ગયો હતો. રિવરફ્રન્ટમાં એક યુવકની ગોળી વાગી હતી. ફાયરિંગ વિથ મર્ડરનો બનાવ સામે આવતા અમદાવાદ પોલીસ દોડતી થઈ ગઈ હતી. તો હવે આ કેસમાં નવો વળાંક આવ્યો છે. રિવરફ્રન્ટ પર હત્યા કરાયેલા યુવકના મિત્રની સળગેલી લાશ મળી આવી છે. બંને મિત્રોની સાથે મળીને હત્યા કરવામાં આવી છે. ત્યારે અમદાવાદ પોલીસ હવે એક સાથે બે હત્યા પાછળના ગુનેગારને શોધવા સક્રિય બની છે.
મંગળવારે સવારે રિવરફ્રન્ટ પરથી યુવકની લાશ મળી આવી હતી. સાબરમતી રિવરફ્રન્ટ પર સ્મિત રાજેશભાઈ ગોહિલ નામના યુવકની હત્યા કરવામાં આવી હતી. રાત્રિ દરમિયાન સ્મિત ગોહિલ નામના યુવકની અજાણ્યા શખ્સોએ હત્યા કરી હતી. છાતીમાં ગોળી વાગતાં સ્મિતનું ઘટનાસ્થળે જ મોત થયું હતું. હત્યાને લઈને પોલીસે ઘટના સ્થળે પહોંચી હત્યારાઓને શોધવા તપાસ શરૂ કરી છે. બીજી તરફ રિવરફ્રન્ટ ફાયરિંગ વિથ મર્ડર કેસમાં નવો વળાંક આવ્યો છે. સ્મિત ચૌહાણના મિત્રની પણ હત્યા કરવામાં આવી છે.
વિરમગામમાંથી સ્મિતના મિત્ર રવિન્દ્ર લુહારની સળગી ગયેલી લાશ મળી આવી છે. રિસાઈ ગયેલા તેના મિત્રને શોધવા નીકળેલા સ્મિતની પણ ગોળી મારી હત્યા કરી દેવામાં આવી હતી. ત્યારે સ્મિતની હત્યાનું રહસ્ય વધુ ને વધુ રહસ્યમય બની રહ્યું છે. બંને મિત્રોની હત્યા પાછળ મોટું કારણ હોવાનું કહેવાય છે. પોલીસ અને ક્રાઈમ બ્રાન્ચે આ મામલે તપાસ શરૂ કરી છે. અમદાવાદ રિવરફ્રન્ટ પર થયેલી હત્યા અને વિરમગામમાં થયેલી હત્યા વચ્ચે એક જ કનેક્શન ખુલ્યું છે. 30 ઓક્ટોબરના રોજ વિરમગામમાં યુવકની લાશ મળી આવી હતી. આ મૃતદેહ રવિન્દ્ર લુહારની હોવાનું બહાર આવ્યું છે.
રવિન્દ્ર લુહાર અને સ્મિત ગોહિલ બંને મિત્રો હતા. રવિન્દ્ર લુહારની હત્યામાં સ્મિત અને અન્ય એક મિત્રની સંડોવણી હોવાની આશંકા છે. રવીન્દ્ર લુહારની હત્યા પૈસાને લઈને થઈ હોવાની આશંકા છે. રવિન્દ્રની હત્યાના સ્થળે સ્મિતિ અને અન્ય મિત્રની હાજરી મળી આવી છે. રવિન્દ્રની છરી અને ગોળી વડે હત્યા કરવામાં આવી હતી. તેથી સ્મિતાની પણ આ જ હથિયારથી હત્યા કરવામાં આવી હોવાની આશંકા છે. હાલ ક્રાઈમ બ્રાન્ચે સમગ્ર મામલામાં હથિયાર શોધવાની કાર્યવાહી શરૂ કરી છે. રવિન્દ્ર અને સ્મિતની હત્યા અન્ય મિત્રએ કરી હોવાની થીયરી પર હવે તપાસ તેજ કરવામાં આવી છે.