વડોદરા.
વડોદરા પાલિકાના આરોગ્ય વિભાગે ખાસ ઝુંબેશ ચલાવીને 2 લાખથી વધુની કિંમતનું 40.20 કિલો પનીર જપ્ત કર્યું છે. આ સાથે દૂધ, તેલ, ચીઝ સહિતના 16 સેમ્પલ ફેલ થતા વેપારીઓ સામે કાયદેસરની કાર્યવાહી હાથ ધરવામાં આવી છે.
વડોદરા મ્યુનિસિપલ કોર્પોરેશનની આરોગ્ય શાખા દ્વારા શહેરના જુદા જુદા વિસ્તારોમાં ટેસ્ટ કરવા માટે અલગ-અલગ ટીમો બનાવીને ખાદ્યપદાર્થોના સેમ્પલ લઈ લેબોરેટરીમાં પરીક્ષણ માટે મોકલવામાં આવ્યા હતા. જેમાંથી દૂધ, તેલ, ચીઝ સહિતના 16 સેમ્પલ ફેલ થતા પાલિકાએ વેપારીઓ સામે કાયદેસરની કાર્યવાહી હાથ ધરી છે.
વડોદરા કોર્પોરેશન લોક કલ્યાણ માટે ખાદ્ય તપાસની પ્રવૃત્તિઓનું આયોજન કરે છે. તાજેતરમાં વડોદરા કોર્પોરેશને જુદા જુદા સમયે જુદા જુદા વિસ્તારોમાં ઓચિંતી તપાસ હાથ ધરી હતી અને પૃથ્થકરણ માટે દૂધ, તેલ, પનીર સહિતની ખાદ્ય ચીજોના શંકાસ્પદ નમૂનાઓ જપ્ત કર્યા હતા. જેમાંથી 16 સેમ્પલ ફેલ થયા છે. તેમાંથી 1 નમૂનાને મિસ બ્રાન્ડેડ અને 15 નમૂના પેટા સ્ટાન્ડર્ડ તરીકે જાહેર કરવામાં આવ્યા છે. આથી વેપારીઓ સામે ફૂડ સેફ્ટી એન્ડ સ્ટાન્ડર્ડ એક્ટ 2006 હેઠળ કાર્યવાહી કરવામાં આવી છે.
ઉલ્લેખનીય છે કે રાજ્યમાં ડુપ્લીકેટ પનીરના વેચાણ અંગે ફૂડ એન્ડ ડ્રગ રેગ્યુલેટરી ઓથોરિટી, ગાંધીનગરને વડોદરા શહેરમાં વેચાતા પનીરની સઘન તપાસ માટે ખાસ ડ્રાઈવ હાથ ધરવા નિર્દેશ આપવામાં આવ્યો હતો. જેના આધારે વડોદરા મહાનગરપાલિકાના ફૂડ વિભાગે ખાસ ઝુંબેશ રૂપે શહેરમાં પનીરનું ઉત્પાદન અને વેચાણ કરતા ઉત્પાદકો અને હોલસેલર્સનું સઘન ચેકિંગ હાથ ધર્યું હતું. આ ઉપરાંત ફૂડ શાખાએ સ્પેશિયલ ઓપરેશન હાથ ધરીને રૂ.2,50,014ની કિંમતનું 40.20 કિલો પનીર જપ્ત કર્યું છે.