નવી દિલ્હી : વિશ્વ બેંકે ભારતના આર્થિક વિકાસ દરના અંદાજમાં ઘટાડો કર્યો છે. વિશ્વ બેંકે વર્તમાન નાણાકીય વર્ષ 2023-24માં ભારતના ગ્રોસ ડોમેસ્ટિક પ્રોડક્ટ (જીડીપી)ના અનુમાનને ઘટાડીને 6.3 ટકા કર્યો છે. વિશ્વ બેંક દ્વારા જાન્યુઆરીમાં કરાયેલા અગાઉના અંદાજ કરતાં આ 0.3 ટકા ઓછું છે.
ગ્લોબલ ઈકોનોમિક પ્રોસ્પેક્ટ્સ પર બહાર પાડવામાં આવેલા તેના તાજેતરના અહેવાલમાં, વિશ્વ બેંકે નાણાકીય વર્ષ 2023-24 માટે ભારતનો આર્થિક વિકાસ દર 6.3 ટકા રહેવાનું અનુમાન કર્યું છે. વિશ્વ બેંકના અહેવાલ મુજબ, ભારતમાં ખાનગી વપરાશ અને રોકાણમાં અભૂતપૂર્વ તેજી જોવા મળી રહી છે. આ સાથે, સેવાઓની વૃદ્ધિ પણ મજબૂત છે.
આ સિવાય વૈશ્વિક વિકાસ દર 2023માં ઘટીને 2.1 ટકા રહેવાનો અંદાજ છે, જે 2022માં 3.1 ટકા હતો. વિશ્વ બેંકના પ્રમુખ અજય બંગાએ કહ્યું કે રોજગાર એ ગરીબી ઘટાડવા અને સમૃદ્ધિ ફેલાવવાનો સૌથી નિશ્ચિત માર્ગ છે. વૃદ્ધિ ધીમી એટલે રોજગારીનું સર્જન પણ મુશ્કેલ બનશે.
નોંધનીય છે કે ફિચ રેટિંગ્સે નાણાકીય વર્ષ 2023-24 માટે ભારતની જીડીપી વૃદ્ધિ 6 ટકા રહેવાનું અનુમાન કર્યું છે. જો કે, નેશનલ સ્ટેટિસ્ટિકલ ઓફિસ (NSO) દ્વારા ગયા અઠવાડિયે જારી કરવામાં આવેલા આંકડા અનુસાર, નાણાકીય વર્ષ 2022-23માં ભારતનો આર્થિક વિકાસ દર 7.2 ટકા રહ્યો છે, જ્યારે અગાઉના નાણાકીય વર્ષ 2021-22માં આ દર 9.1 ટકા હતો.