મુંબઈઃ ગુરુવારે પ્રારંભિક વેપારમાં યુએસ ડોલર સામે રૂપિયો 39 પૈસા વધીને 82.36 પર પહોંચ્યો હતો કારણ કે સકારાત્મક મેક્રોઇકોનોમિક ડેટાએ રોકાણકારોના સેન્ટિમેન્ટને વેગ આપ્યો હતો. ઇન્ટરબેંક ફોરેન એક્સચેન્જ માર્કેટમાં રૂપિયો પ્રતિ ડોલર 82.54 પર ખુલ્યો હતો. પાછળથી તે તેના પાછલા બંધ કરતાં 39 પૈસાનો વધારો નોંધાવીને 82.36 પ્રતિ ડોલર પર સ્થિર થયો હતો. બુધવારે રૂપિયો પ્રતિ ડૉલર 82.75 ના સ્તર પર બંધ થયો હતો. સ્થાનિક મેક્રો ઇકોનોમિક ડેટા મોરચે, 2022-23માં કેન્દ્રની રાજકોષીય ખાધ જીડીપીના 6.4 ટકા પર આવી ગઈ છે.
અગાઉના નાણાકીય વર્ષમાં તે 6.71 ટકા હતો. આ સિવાય ગયા નાણાકીય વર્ષના ચોથા ક્વાર્ટરમાં ભારતીય અર્થવ્યવસ્થા 6.1 ટકાના દરે વૃદ્ધિ પામી હતી. સમગ્ર નાણાકીય વર્ષ 2022-23માં આર્થિક વિકાસ દર 7.2 ટકા રહ્યો છે. દરમિયાન, ડોલર ઇન્ડેક્સ, જે અન્ય છ કરન્સી સામે ડોલરને માપે છે, તે 0.09 ટકા ઘટીને 104.23 થયો હતો. બ્રેન્ટ ક્રૂડ વાયદો 1.20 ટકા ઘટીને $72.66 પ્રતિ બેરલ પર ટ્રેડ થઈ રહ્યો હતો.