આજે એટલે કે 23મી ફેબ્રુઆરીએ ટ્રેડિંગના છેલ્લા દિવસે ભારતીય શેરબજાર સામાન્ય ઘટાડા સાથે બંધ થયું હતું. જો કે સવારે બજાર ઉછાળા સાથે ખુલ્યું હતું. બજાર ખુલતાની સાથે જ નિફ્ટી 22,297ની સર્વોચ્ચ સપાટીએ પહોંચી ગયો હતો. અગાઉ 21 ફેબ્રુઆરીના રોજ નિફ્ટી 22,249ની સર્વકાલીન ટોચે પહોંચી હતી. દિવસના ટ્રેડિંગ પછી નિફ્ટી 4 પોઈન્ટ ઘટીને 22,212 પર બંધ થયો હતો. આ સાથે જ સેન્સેક્સ પણ 15 પોઈન્ટ ઘટીને 73,142 પર બંધ થયો હતો. સેન્સેક્સના 30 શેરોમાંથી 17માં ઘટાડો અને 13માં વધારો થયો હતો.
ગઈકાલે બજારમાં તેજી જોવા મળી હતી
આ પહેલા ગઈકાલે એટલે કે ગુરુવારે શેરબજારમાં શાનદાર ઉછાળો જોવા મળ્યો હતો. સેન્સેક્સ 536 પોઈન્ટના ઉછાળા સાથે 73,158 પર બંધ રહ્યો હતો. નિફ્ટીમાં પણ 162 પોઈન્ટનો ઉછાળો જોવા મળ્યો હતો. જ્યારે નિફ્ટી 22,217 પર બંધ રહ્યો હતો. સેન્સેક્સના 30 શેરોમાંથી 22 વધ્યા અને આઠમાં ઘટાડો થયો. આઇટી અને ઓટો શેરોમાં તેજી હતી જ્યારે બેન્કિંગ શેરોમાં ઘટાડો જોવા મળ્યો હતો.
માર્કેટ કેપમાં જોરદાર ઉછાળો
આજના કારોબારમાં શેરબજારના માર્કેટ કેપમાં સારો એવો વધારો જોવા મળ્યો હતો. બીએસઈના ડેટા અનુસાર લિસ્ટેડ શેરનું માર્કેટ કેપ રૂ. 392.81 લાખ કરોડ પર બંધ થયું હતું. જે ગયા સત્રમાં 392.19 લાખ કરોડ રૂપિયા હતો. આજના કારોબારમાં ભારતીય શેરબજારની માર્કેટ મૂડીમાં રૂ. 62 હજાર કરોડનો જોરદાર ઉછાળો આવ્યો હતો.