AI જનરેટેડ અશ્લીલ વીડિયો દ્વારા છેતરપિંડીનું નેટવર્ક અમદાવાદમાં ઝડપાયું
(એજન્સી)અમદાવાદ, શહેરમાં આર્ટિફિશિયલ ઇન્ટેલિજન્સ ટેકનોલોજીનો દુરુપયોગ કરી નિર્દોષ લોકોને હનીટ્રેપમાં ફસાવતું એક મોટું નેટવર્ક અમદાવાદ ક્રાઈમ બ્રાંચે શોધી કાઢ્યું છે.
એસ્કોર્ટ સર્વિસના નામે યુવતીઓના એડિટ કરેલા અને એઆઈ જનરેટેડ અભદ્ર વીડિયો સોશિયલ મીડિયા પર વાયરલ કરી લોકોને આકર્ષવામાં આવતા હતા. ક્રાઈમ બ્રાંચની પ્રાથમિક તપાસમાં આ કૌભાંડના તાર રાજસ્થાન અને છત્તીસગઢ સુધી જોડાયેલા હોવાનું સામે આવ્યું છે.
સાયબર ક્રિમિનલ્સ હવે છેતરપિંડી માટે અદ્યતન ટેકનોલોજીનો સહારો લઈ રહ્યા છે. આ ટોળકી ઇન્સ્ટાગ્રામ અને ફેસબુક જેવા પ્લેટફોર્મ પર સુંદર યુવતીઓના એઆઈ દ્વારા તૈયાર કરેલા નકલી વીડિયો અને ફોટા મૂકતા હતા.
એસ્કોર્ટ સર્વિસ કે ડેટિંગના નામે સંપર્ક કરનારા યુવાનો પાસે રજિસ્ટ્રેશન કે અન્ય બહાના હેઠળ નાની-નાની રકમ પડાવવામાં આવતી હતી. એકવાર પેમેન્ટ મળ્યા પછી ઠગ ટોળકી સંપર્ક કાપી નાખતી અથવા વધુ નાણાં માટે બ્લેકમેલ કરતી હતી.
અમદાવાદ ક્રાઈમ બ્રાંચના પીઆઈ આર.એલ. ગોયલે આ અંગે વિગતો આપતા જણાવ્યું હતું કે, તપાસ દરમિયાન દેશભરમાં ફેલાયેલું આ નેટવર્ક સામે આવ્યું છે. અત્યાર સુધીમાં ૧૨૦થી વધુ શંકાસ્પદ સોશિયલ મીડિયા પ્રોફાઇલની ઓળખ કરી તેને બંધ કરાવવાની પ્રક્રિયા હાથ ધરવામાં આવી છે. પોલીસ આ પ્રોફાઈલના આઈપી એડ્રેસ મેળવીને આરોપીઓ સુધી પહોંચવા કવાયત કરી રહી છે.
પોલીસના મતે, આ પ્રકારની છેતરપિંડીમાં મોટાભાગના ભોગ બનનાર લોકો પોતાની સામાજિક પ્રતિષ્ઠા અને બદનામીના ડરથી પોલીસ ફરિયાદ નોંધાવતા અચકાય છે. ઠગ ટોળકી આ માનસિકતાનો જ લાભ ઉઠાવીને લાંબા સમયથી પોતાનો કાળો કારોબાર ચલાવી રહી હતી. હાલમાં જે બેંક એકાઉન્ટ્સમાં ઓનલાઈન નાણાં ટ્રાન્સફર થયા છે, તેની વિગતોના આધારે મની ટ્રેલની તપાસ શરૂ કરવામાં આવી છે.
ક્રાઈમ બ્રાંચ દ્વારા નાગરિકોને અપીલ કરવામાં આવી છે કે, સોશિયલ મીડિયા પર અજાણી પ્રોફાઈલ કે લલચામણી ઓફર જોઈને કોઈને પણ ઓનલાઈન પેમેન્ટ ન કરવું. જો તમારી સાથે આવી કોઈ ઘટના બને તો ગભરાયા વગર તુરંત સાયબર હેલ્પલાઈન અથવા નજીકના પોલીસ સ્ટેશનમાં જાણ કરવી જોઈએ, જેથી અન્ય લોકોને શિકાર બનતા અટકાવી શકાય.
