મુખ્યમંત્રી શ્રી ભૂપેન્દ્ર પટેલનો એ.આઈ. સેક્ટરના યુવા સ્ટાર્ટઅપ્સને પ્રોત્સાહિત કરતો અનોખો અભિગમ –દેશના વિવિધ રાજ્યોના ઉચ્ચ સંભવિત સ્ટાર્ટ અપ્સ સાથે મુખ્યમંત્રીશ્રીએ પ્રત્યક્ષ સંવાદ કર્યો
યુવા સ્ટાર્ટઅપની પ્રોડક્ટ્સનું મુખ્યમંત્રી નિવાસસ્થાન પરિસરમાં પ્રદર્શન નિહાળ્યું-ગુજરાતને AI અને ઈમર્જીંગ ટેક્નોલોજી માટે ગ્લોબલ સેન્ટર બનાવવાની દિશામાં રાજ્ય સરકારના સાયન્સ એન્ડ ટેક્નોલોજી વિભાગનું બહુ આયામી આયોજન
શાસનમાં પારદર્શિતા અને નાગરિકોની સુખાકારી માટે AI ટેકનોલોજીનો મહત્તમ ઉપયોગ કરવાની ગુજરાત સરકારની પ્રતિબદ્ધતા વ્યક્ત કરતાં મુખ્યમંત્રી-સ્ટાર્ટ અપને AI સોલ્યુશનના પ્રુફ ઓફ કોન્સેપ્ટ (PoC) માટે રાજ્ય સરકાર દ્વારા ફાયનાન્સિયલ સપોર્ટ મોડલની જાહેરાત
અમદાવાદ, મુખ્યમંત્રી શ્રી ભૂપેન્દ્ર પટેલના નેતૃત્વમાં ગુજરાતને યુવા સ્ટાર્ટ અપ્સના સ્કેલેબલ અને ઈફેક્ટિવ સોલ્યુશન્સથી વધુ સક્ષમ કરીને AI અને ઉભરતી ટેક્નોલોજી માટે ગ્લોબલ સેન્ટર બનાવવાની દિશામાં સ્ટાર્ટ અપ સંવાદનું ગાંધીનગરમાં મહત્વપૂર્ણ આયોજન કરવામાં આવ્યું હતું.
મુખ્યમંત્રીશ્રીએ આ સ્ટાર્ટ અપ સંવાદમાં દેશના રાજ્યોના 24 જેટલા ઉચ્ચ સંભવિત સ્ટાર્ટ અપ્સ સાથે પ્રત્યક્ષ સંવાદ-વાતચિત કરીને તેમના અનુભવો અને ઈનોવેશન વિશે જાણવામાં ખુબ જ ઉત્સુકતા દર્શાવી હતી.
સ્ટાર્ટઅપ્સ સાથેના આ સંવાદ દરમિયાન મુખ્યમંત્રીશ્રીએ જણાવ્યું કે, વડાપ્રધાન શ્રી નરેન્દ્રભાઈ મોદીએ ગુજરાતના મુખ્યમંત્રી તરીકે રાજ્યના વિકાસનો જે મજબૂત પાયો નાખ્યો છે, તેના કારણે આજે ગુજરાત નાણાંકીય શિસ્ત સાથે નવી ટેકનોલોજીને ઝડપથી અપનાવવામાં દેશમાં મોખરે છે. એટલું જ નહિ, ઈમર્જિગ સેક્ટર્સ એવા એ.આઈ., સેમિકંડક્ટર અને ગ્રીન ગ્રોથ દ્વારા સસ્ટેનેબલ ડેવલપમેન્ટના લક્ષ્યો સિદ્ધ કરવા તરફ ગતિ કરી છે.
એગ્રીકલ્ચર સેક્ટરમાં એ.આઈ. ટેક્નોલોજીના વિવિધ ઉપયોગ અંગેના 5 સ્ટાર્ટઅપ, હેલ્થ સેક્ટરમાં 3 તેમજ શિક્ષણના વિવિધ આયામો પર એ.આઈ. આધારિત કામગીરી કરતા 6 અને ગવર્મેન્ટ અને ઈન્ડસ્ટ્રીઝ સેક્ટરના 10 જેટલા સ્ટાર્ટઅપએ પોતાની કામગીરી અને પ્રોડક્ટનું પ્રસ્તુતીકરણ આ સંવાદ દરમિયાન મુખ્યમંત્રીશ્રી અને સૌ ઉપસ્થિતો સમક્ષ કર્યુ હતુ.
આ તકે મુખ્યમંત્રીશ્રીએ સ્પષ્ટ મત વ્યક્ત કર્યો હતો કે, રાજ્ય સરકાર સાથે કામ કરવા માટે પ્રતિભાશાળી સ્ટાર્ટઅપ્સને પ્રાયોરિટી આપવાની સરકારની નેમ છે. જેથી નાવાચાર તથા નવા ઉદ્યમીઓને પ્રોત્સાહન મળે. AI ના ઉપયોગથી સરકારી કામકાજની ગતિ હજુ પણ વધારવી, કામમાં વધુ પારદર્શિતા લાવવી અને સરકારી યોજનાઓના લાભો ટેકનોલોજીના સહારે છેવાડાના માનવી સુધી ઝડપથી પહોંચાડવા તે જ સરકારનો મુખ્ય ઉદ્દેશ્ય છે તેમ પણ તેમણે ઉમેર્યું હતું.
નાગરિકોની સુખાકારીમાં તેમજ સરકારની કાર્યક્ષમતામાં વધારો કરતા દરેક સ્ટાર્ટઅપ્સને સપોર્ટ કરવા માટે રાજ્ય સરકાર તત્પર છે, પરંતુ આ વિઝનને સાકાર કરવા માટે સૌનો પ્રયાસ અને દિશા એક હોવી ખૂબ જ જરૂરી છે. ટેકનોલોજી આધારિત વિકાસમાં ‘ક્વોલિટી’ રાજ્ય સરકારની પ્રથમ પ્રાથમિકતા રહેશે, તેવો તેમણે સ્પષ્ટ મત વ્યક્ત કર્યો હતો.
રાજ્ય સરકારના સાયન્સ એન્ડ ટેક્નોલોજી વિભાગ દ્વારા મુખ્યમંત્રીશ્રીના નિવાસસ્થાને યોજાયેલા આ AI સંવાદ દરમિયાન સાયન્સ ટેક્નોલોજી વિભાગ અને સર્વમ AI તથા MIKO સ્ટાર્ટઅપ સાથે એમ.ઓ.યુ. કરવામાં આવ્યા હતા. ઉપરાંત AI સેન્ટર ઓફ એક્સેલન્સ, ગુજરાતની પેમેન્ટ મોડાલીટીઝનું પણ લોકાર્પણ કરવામાં આવ્યું હતું.
