ગાંધીનગર, કલોલ શહેરના કર્મયોગી વિસ્તારમાં આવેલા ઓઈલના ગોડાઉનમાં ગત મધરાતે ભીષણ આગ ફાટી નીકળતા અફરાતફરીનો માહોલ સર્જાયો હતો. સલામતીના ભાગરૂપે તંત્રને સમગ્ર વિસ્તારનો પાવર સપ્લાય કટ કરી સર્વિસ રોડ બંધ કરી મેજર કોલ જાહેર કરવો પડ્યો હતો. અંતે કલાકોની જહેમત બાદ આગ પર કાબૂ મેળવી લેવાયો હતો. સદનસીબે આ આગમાં કોઈ જાનહાનિ નહીં થતાં તંત્રએ હાશકારો અનુભવ્યો હતો.
૧૮મી માર્ચની મોડી રાત્રે જયારે લોકો નિદ્રાધીન હતા ત્યારે કર્મયોગી સોસાયટીમાં આવેલા ઓઈલ અને ટાયરના ગોડાઉનમાંથી અચાનક આગની જ્વાળાઓ ભભૂકી ઉઠી હતી. ઓઈલ અને ગ્રીસ જેવા જ્વલનશીલ પદાર્થોના કારણે આગે ઝડપથી રૌદ્ર સ્વરૂપ ધારણ કર્યું હતું. જાણ થતાની સાથે નજીકના રહીશોમાં ફફડાટ વ્યાપી ગયો હતો અને લોકો જીવ બચાવવા ઘરની બહાર દોડી ગયા હતા.
આગની ગંભીરતાને જોતા કલોલ ફાયર બ્રિગેડ દ્વારા તાત્કાલિક અન્ય કેન્દ્રોની મદદ લેવામાં આવી હતી. જેમાં કલોલ, કડી, ઈફકો, ઓએનજીસી અને ગાંધીનગરથી કુલ ૮ ફાયર ફાઈટરો ઘટનાસ્થળે પહોચ્યા હતા.
ફાયર સૂત્રોએ કહ્યું કે, ઓઈલની આગ હોવાથી પાણીની સાથે સ્પેશિયલ ફાયર ફાઈટિંગ ફોમનો મારો કરવો પડ્યો હતો. સાવચેતીના ભાગરૂપે બાજુમાં આવેલી હોસ્પિટલ અને સોસાયટીના મકાનો ખાલી કરાવવામાં આવ્યા હતા, આખા વિસ્તારનો પાવર સપ્લાય કાપી નાખવામાં આવ્યો હતો અને સર્વિસ રોડને પણ અવરજવર માટે બંધ કરી દેવાયો હતો.
બનાવની જાણ થતા જ મામલતદાર, કલોલ પાલિકાના ચીફ ઓફિસર અને સ્થાનિક વહીવટી તંત્રના ઉચ્ચ અધિકારીઓ અને પોલીસ કાફલો સ્થળ પર દોડી ગયા હતા. આગના કારણે ઓઈલ, ગ્રીસ અને ટાયરનો જથ્થો બળી જવાથી ભારે નુકસાન થવાનો અંદાજ છે. શોર્ટ સર્કિટથી આગ લાગી હોવાની સંભાવના સાથે પોલીસ સહિતના તંત્રએ તપાસ આદરી છે.
