૯ જિલ્લામાં રેડ ઍલર્ટ-ગુરૂવારે સાંજે પણ મિનિ વાવાઝોડા જેવી સ્થિતિ સર્જાઇ છે, અનેક વિસ્તારોમાં કરા સાથે વરસાદ ખાબક્યો
હવામાન વિભાગના નાઉ કાસ્ટ મુજબ, ૧૯ માર્ચ દેવભૂમિ દ્વારકા, પોરબંદર, જામનગર, રાજકોટ, જૂનાગઢ, ગીર સોમનાથ, દીવ, કચ્છ, અમરેલી અને પાટણ જિલ્લામાં ૬૨થી ૮૭ કિ.મી.ની ઝડપે પવન ફૂંકાવવાની સાથે કમોસમી વરસાદને લઈને રેડ ઍલર્ટ જાહેર કર્યુ છે.
જ્યારે મોરબી, સુરેન્દ્રનગર, બોટાદ, ભાવનગર, બનાસકાંઠા, સાબરકાંઠા, મહેસાણા, અમદાવાદ, ગાંધીનગર, અરવલ્લી અને મહીસાગર જિલ્લામાં ૪૧થી ૬૧ કિ.મી.ની ઝડપે પવન ફૂંકાશે. આ સાથે કમોસમી વરસાદ, મેઘગર્જના અને કરા પડવાની શક્યતા છે. તેમજ ખેડા, આણંદ, વડોદરા, પંચમહાલ, દાહોદ, છોટા ઉદેપુર, ભરૂચ, નર્મદા, સુરત, તાપી, ડાંગ, નવસારી, વલસાડ જિલ્લામાં યલો ઍલર્ટ જાહેર કર્યું છે.
(એજન્સી)અમદાવાદ, કચ્છના વાગડ અને પશ્ચિમ કચ્છમાં કુદરતનો બેવડો માર જોવા મળ્યો છે. રાત્રે ફૂંકાયેલા વાવાઝોડા બાદ ગુરૂવારે સાંજે પણ મિનિ વાવાઝોડા જેવી સ્થિતિ સર્જાઇ છે, અનેક વિસ્તારોમાં કરા સાથે વરસાદ ખાબક્યો છે.
પવનના જોરને કારણે કંડલામાં મોબાઈલ ટાવર ધરાશાયી થયો છે, તેમજ કંડલા પોર્ટ પર લાકડાનો જથ્થોને કન્ટેન્ટરને પવનના સુસવાટાના કારણે ભારે નુકસાન થયું છે. નખત્રાણા, લખપત અને અબડાસામાં વરસાદને કારણે વરિયાળી, ઈસબગુલ, એરંડા અને ઘઉંના પાકને ભારે નુકસાન થતા ખેડૂતો ચિંતાતુર બન્યા છે.
રાજ્યનું આર્થિક પાટનગર ગણાતા અમદાવાદમાં વરસાદ કરતા પવનનું જોર વધુ જોવા મળ્યું. અમદાવાદ શહેર અને જિલ્લાના અનેક વિસ્તારોમાં વાતાવરણમાં પલટો જોવા મળ્યો છે. સમી સાંજે આંધી આવતા શહેર પર ધૂળની ડમરીઓનું રાજ જોવા મળ્યું, સિંધુભવન રોડ સહિત અનેક વિસ્તારોમાં તોતીંગ વૃક્ષો ધરાશાયી થયા હતા. ગત મોડી રાત્રે પવન એટલો તેજ હતો કે અનેક જગ્યાએ સાઈનબોર્ડ અને ર્હોડિંગ્સ નીચે પડ્યા હતા.
એએમસીની ટીમ હાલ રસ્તાઓ સાફ કરવાની કામગીરી કરી રહી છે. ગોંડલ, જેતપુર, ધોરાજી અને ઉપલેટા પંથકમાં પણ ભારે પવન સાથે માવઠું થયું છે. પવનની ગતિ વધુ હોવાથી અનેક સ્થળોએ વૃક્ષો પડવાના બનાવો નોંધાયા છે. રાજકોટમાં ૧ ઈંચ જેટલો વરસાદ થયો હોવાનું અનુમાન છે. જામનગરમાં ચૈત્ર માસમાં અષાઢ જેવો માહોલ સર્જાયો હતો. લાલપુરમાં ૧૬મીમી અને અન્ય ગ્રામ્ય વિસ્તારોમાં અડધા કલાકમાં ૧ ઇંચ જેટલો વરસાદ ખાબક્યો હતો.
જીરું, લસણ, મેથી અને ચણા જેવા તૈયાર પાકો ખેતરમાં જ પલળી જતા મોંમાં આવેલો કોળિયો છીનવાઈ ગયો હોય તેવી સ્થિતિ સર્જાઈ છે. સવારે ૦૬.૦૦ થી સાંજના ૧૬.૦૦ કલાક એટલે કે ૪ વાગ્યામાં સુધીમાં ગુજરાતમાં નોંધાયેલા કમોસમી વરસાદની વિગતો મુજબ, સૌથી વધુ વરસાદ દેવભૂમિ દ્વારકાના ઓખામંડળ તાલુકામાં ૦.૭૯ ઈંચ નોંધાયો છે. ત્યારબાદ જામનગરના લાલપુર તાલુકામાં ૦.૬૩ ઈંચ અને કચ્છના મુંદ્રા તાલુકામાં ૦.૫૯ ઈંચ વરસાદ પડ્યો છે.
કચ્છ જિલ્લાના અન્ય તાલુકાઓની વાત કરીએ તો, ભુજ માં ૦.૩૫ ઈંચ જેટલો વરસાદ થયો છે. જ્યારે નખત્રાણા, અબડાસા અને લખપત ત્રણેય તાલુકાઓમાં એકસમાન ૦.૩૧ ઈંચ વરસાદ નોંધાયો છે. આ વરસાદ મુખ્યત્વે બપોરે ૨ થી ૪ વાગ્યાના સમયગાળા દરમિયાન પડ્યો છે, જો કે લખપત માં બપોરે ૧૨ વાગ્યાથી જ વરસાદની શરૂઆત થઈ ગઈ હતી. મોરબી જિલ્લામાં ભારે પવન સાથે ખાબકેલા કમોસમી વરસાદે અનેક જગ્યાએ નુકસાન કર્યું છે.
નવલખી બંદર પર દરિયામાં કરંટ જોવા મળ્યો હતો અને તેજ પવનને કારણે કોલસાની ડમરીઓ ઉડતા વિઝિબિલિટી ઘટી હતી. અનેક જગ્યાએ પતરા ઉડવાના બનાવો પણ બન્યા છે. માળિયા મિયાણાના રાયસંગપર પાસે ૪૦૦ કેવીનો વીજ ટાવર નમી પડતા વીજ પુરવઠો ખોરવાયો છે. વરસામેડી પંથકમાં વરસાદ પડતા મીઠાના ઉત્પાદન પર વિપરીત અસર પડી છે. હવામાન વિભાગના આંકડા મુજબ આજે સવારથી સાંજ સુધીમાં દેવભૂમિ દ્વારકાના ઓખામાં સૌથી વધુ ૨૦મીમી વરસાદ નોંધાયો છે, જેના કારણે નીચાણવાળા વિસ્તારોમાં પાણી ભરાયા હતા.
હવામાન વિભાગ દ્વારા કરવામાં આવેલી આગાહી મુજબ આગામી તા. ૨૧ માર્ચ, ૨૦૨૬ સુધી રાજ્યના વિવિધ જિલ્લાઓમાં ગાજવીજ સાથે હળવાથી મધ્યમ કમોસમી વરસાદ પડવાની શક્યતા છે. મુખ્યત્વે બનાસકાંઠા, પાટણ, સાબરકાંઠા, જામનગર, મોરબી, કચ્છ, રાજકોટ, જૂનાગઢ, અમરેલી, ભાવનગર અને દક્ષિણ ગુજરાતના જિલ્લાઓમાં છૂટાછવાયા સ્થળોએ વરસાદની શક્યતા છે.
