સુરતમાં ઇન્સ્ટા ફ્રેન્ડે વોટ્સએપ પર ન્યૂડ ફોટા મંગાવી વાઇરલ કરવાની ધમકી આપી પાલની હોટલમાં લઈ ગયો
સુરત,સુરતમાં સોશિયલ મીડિયાના માધ્યમથી સગીરાને પ્રેમજાળમાં ફસાવી, લગ્નની લાલચ આપી બ્લેકમેલિંગ દ્વારા દુષ્કર્મ આચરવાની હીન ઘટના પ્રકાશમાં આવતા ચકચાર મચી ગઈ છે. ઈન્સ્ટાગ્રામ પર મિત્ર બનેલા લિંબાયતના નરાધમે સગીરાના નગ્ન ફોટા અને વીડિયો મેળવી તેને શારીરિક-માનસિક ત્રાસ આપ્યો હતો. એટલું જ નહીં, સગીરાનો ભાઈ જ્યારે તેને સમજાવવા ગયો ત્યારે તેને પણ ‘ઉંચકાવી લેવાની’ ધમકી આપતા આખરે મામલો પોલીસ મથકે પહોંચ્યો છે.
ઈચ્છાપોર પોલીસે આ મામલે ત્વરિત કાર્યવાહી કરી આરોપી મોહંમદ સાજીદ પઠાણની ધરપકડ કરી જેલના સળિયા પાછળ ધકેલી દીધો છે.ઘટનાની વિગતો મુજબ સુરતમાં રહેતી અને ધોરણ ૧૨માં અભ્યાસ કરતી સગીરા માર્ચ-૨૦૨૫માં ઈન્સ્ટાગ્રામના માધ્યમથી લિંબાયતની ક્રિષ્ણાનગર સોસાયટીમાં રહેતા ૨૩ વર્ષીય મોહંમદ સાજીદ ઉર્ફે અહદ મોહંમદ જાવેદ પઠાણના સંપર્કમાં આવી હતી.
ગ્લાસની દુકાનમાં મજૂરી કામ કરતા સાજીદે મીઠી-મીઠી વાતો કરી સગીરાને લગ્નના સપના બતાવી વિશ્વાસમાં લીધી હતી. ત્યારબાદ પોતાની અસલી દાનત બતાવી સાજીદે સગીરા પાસે વોટ્સએપ પર નગ્ન ફોટા મંગાવ્યા હતા. ભોળી સગીરાએ ફોટા મોકલતા જ સાજીદે પોતાનો અસલી ચહેરો બતાવ્યો હતો અને આ ફોટા સોશિયલ મીડિયામાં વાઇરલ કરી દેવાની ધમકી આપી બ્લેકમેલિંગ શરૂ કર્યું હતું.ધમકીઓથી ફફડી ગયેલી સગીરાને સાજીદ પાલ વિસ્તારની એક હોટલમાં લઈ ગયો હતો, જ્યાં તેની મરજી વિરુદ્ધ બળજબરીથી દુષ્કર્મ આચર્યું હતું.
આ દરમિયાન નરાધમે અંગત પળોનો વીડિયો પણ ઉતારી લીધો હતો, જેના આધારે તે સતત સગીરા પર દબાણ બનાવી તેના ઘરની આસપાસ આંટાફેરા મારી માનસિક ત્રાસ આપતો હતો. આ પાપનો ભાંડો ત્યારે ફૂટ્યો જ્યારે સગીરાનો મોબાઈલ તેના ભાઈના હાથમાં આવ્યો અને તેમાં આપત્તિજનક ચેટ તથા ફોટા મળી આવ્યા હતા.
જ્યારે સગીરાનો ભાઈ સાજીદને ઠપકો આપવા ગયો, ત્યારે આરોપીએ ઉદ્ધતાઈપૂર્વક ‘તને ઊંચકાવીને ગમે ત્યાં ફેંકી દઈશ’ તેવી ધમકી આપી હતી. આખરે પરિવારે હિંમત દાખવી પોલીસ ફરિયાદ નોંધાવતા પોલીસે ગણતરીના કલાકોમાં સાજીદને દબોચી લીધો છે અને તે અન્ય કોઈ યુવતીઓને પણ આ રીતે શિકાર બનાવી છે કે કેમ તે દિશામાં તપાસ હાથ ધરી છે.SS1
