અમદાવાદ: શહેરના પશ્ચિમ વિસ્તારમાં આવેલા બોપલ-શેલા રોડ પર આજે એક રહેણાંક બિલ્ડિંગમાં આગ લાગવાની ગંભીર ઘટના સામે આવી છે. પોશ ગણાતા ‘સ્કાય સિટી રિવેરા એલાઇટ’ (Sky City Riviera Elite) બિલ્ડિંગના એક ફ્લેટમાં અચાનક આગ ફાટી નીકળતા સમગ્ર વિસ્તારમાં ચકચાર મચી ગઈ છે.
પ્રાપ્ત વિગતો મુજબ, બિલ્ડિંગના ‘C બ્લોક’ના ત્રીજા માળે આવેલા એક ફ્લેટમાં અચાનક આગ લાગી હતી. જોતજોતામાં આગે વિકરાળ સ્વરૂપ ધારણ કરી લીધું હતું. આગની જ્વાળાઓ અને કાળા ધુમાડાના ગોટા એટલા ઉંચે સુધી ઉડ્યા હતા કે તે દૂર-દૂર સુધી જોઈ શકાતા હતા. સવારના સમયે લાગેલી આ આગને કારણે બિલ્ડિંગમાં રહેતા રહીશોમાં ભારે ફફડાટ અને ભયનો માહોલ જોવા મળ્યો હતો. લોકો જીવ બચાવવા માટે બિલ્ડિંગની બહાર દોડી આવ્યા હતા.
ઘટનાની જાણ થતા જ અમદાવાદ ફાયર વિભાગ તુરંત હરકતમાં આવ્યું હતું. આગની ગંભીરતાને જોતા ૧૦થી વધુ ફાયર ટેન્ડરો અને હાઈડ્રોલિક પ્લેટફોર્મ તાત્કાલિક ઘટનાસ્થળે રવાના કરવામાં આવ્યા હતા. ફાયર ફાઈટરો દ્વારા હાલમાં આગ પર કાબૂ મેળવવાની કામગીરી યુદ્ધના ધોરણે ચાલી રહી છે.
આગ લાગવાનું ચોક્કસ કારણ હજુ જાણી શકાયું નથી, પરંતુ શોર્ટ સર્કિટને કારણે આગ લાગી હોવાનું પ્રાથમિક અનુમાન લગાવવામાં આવી રહ્યું છે.
