ધનલક્ષ્મી ઓઈલ મિલમાંથી ૪૭૧ સિંગતેલના ડબ્બા ભરી અમદાવાદ ગાડી મોકલવાની હતી
ગોંડલ, ભોજપરા ગામે પાસે આવેલા ઓઈલ મિલમાંથી સિંગતેલના ૪૭૧ ડબ્બા ભરેલો ટ્રક લઈ રાજસ્થાનના બે શખ્સ ફરાર થઈ રૂ.ર૮.૧૩ લાખની ઠગાઈની ગોડલ તાલકુ પોલીસ મથકમાં ફરિયાદ નોંધાઈ હતી.
જેતપુરના નવાગઢમાં રહેતા રાજેશભાઈ ઉર્ફે આયુષ જીતેશભાઈ સંખેસરિયાએ આરોપી તરીકે રાજસ્થાનના પંકજ બન્ના અને સુરેશનું નામ આપતાં તાલુકા પોલીસે તપાસ આદરી હતી.
ફરિયાદીએ જણાવ્યું હતું કે, તેઓ જેતપુર, નવાગઢ ખાતે લાખણેચી કૃપા ટ્રાન્સપોર્ટ નામથી ટ્રાન્સપોર્ટનો ધંધો કરે છે. ટ્રાન્સપોર્ટમાં અલગ અલગ માલિકની આશરે ૩૦ જેટલી ગાડી ચાલે છે. ત્રણેક મહિનાથી દિલ્હીના દર્શનલાલ બિહારીલાલની કંપની સાથે વેપાર ધંધો કરે છે. ગત તા.ર૩ના બિહારીલાલનો ફોન આવ્યો કે ભોજપરા ગામે પાસે આવેલ ધનલક્ષ્મી ઓઈલ મિલમાંથી ૪૭૧ સિંગતેલના ડબ્બા ભરી અમદાવાદ ગાડી મોકલવાની છે
જેથી તેઓએ રાજકોટના યશભાઈ મુંધવાને ફોન કરી ટ્રક મોકલવા જણાવતા તેમણે એક ટ્રક બે ડ્રાઈવર સાથે મોકલ્યો હતો. જેમાં પંકજ બન્ના અને સુરેશ ડ્રાઈવર તરીકે હતા. જેમણે ભોજપરા ગામ પાસેથી સિંગતેલના ૪૭૬ ડબ્બાની ગાડી ભરી હતી. ડ્રાઈવર પંકજને લોકેશન મોકલી ત્યાં ખાલી કરવાનું કહ્યું હતું. ગાડી તા.ર૪ના સાંજના છ વાગ્યે તેલના ડબ્બા ભરી અમદાવાદ ખાતે જવા રવાના થઈ હતી.
આ ટ્રક ખાલી કરવાની હતી ત્યાં પૂછપરછ કરતા ટ્રક આવી નહોતી. ઉપરાંત ડ્રાઈવરનો ફોન બંધ આવતા હોય શંકા જતા ટ્રકના માલિક યશભાઈએ ગોંડલથી અમદાવાદ સુધીની લાઈન રૂટની તપાસ કરતાં જાણવા મળ્યું કે આ આઈસર ગાડી અમદાવાદના એસપી રીંગ રોડ ત્રાગડ ટોલનાકાએ વહેલી સવારે નીકળી હતી. આ રૂટ ઉપર આગળ તપાસ કરતાં ગાડી બાબતે કોઈ માહિતી મળી નહીં.
બન્ને ડ્રાઈવરના મોબાઈલ ફોન બંધ હતા જેથી બન્ને ડ્રાઈવરે સિંગતેલના ૪૭૬ ડબ્બા રૂ.૧૩,૧૩,૭૩૪નો મુદ્દામાલ શાંતેજ અમદાવાદ ખાતે ખાલી કરવાના બદલે પોતાના અંગત આર્થિક લાભ મેળવવા રૂ.૧૩.૧૩ લાખનું સિંગતેલ અને ગાડી રૂ.૧પ લાખ મળી કુલ રૂ.ર૮.૧૩ લાખનો મુદ્દામાલ બારોબાર લઈ જઈ છેતરપિંડી કરતા ફરિયાદ નોંધાવી હતી.
