અમદાવાદ મ્યુનિ. પ્લોટ ભાડે આપી કોમર્શિયલ વિસ્તારોમાં પાર્કિંગ સુવિધા…

અમદાવાદ (પ્રતિનિધિ),અમદાવાદ શહેરમાં વધતી ટ્રાફિક અને પાર્કિંગની સમસ્યાને ધ્યાનમાં રાખીને અમદાવાદ મ્યુનિસિપલ કોર્પોરેશન (AMC) દ્વારા એક મહત્વપૂર્ણ અને પ્રાયોગિક પહેલ હાથ ધરવામાં આવી છે.

શહેરના પશ્ચિમ વિસ્તારમાં ખાસ કરીને સરખેજ અને જોધપુર વિસ્તારોમાં આવેલા એવા કોમર્શિયલ કોમ્પલેક્ષો, જ્યાં પોતાની પાર્કિંગ સુવિધા ઉપલબ્ધ નથી, તેઓ માટે AMCએ પોતાના ખુલ્લા પ્લોટ્સ સમયબદ્ધ ધોરણે ભાડે આપીને પાર્કિંગ વ્યવસ્થા ઉભી કરવાની મંજૂરી આપી છે. AMCની આ પહેલથી અવ્યવસ્થિત પાર્કિંગ અને ટ્રાફિક દબાણમાં રાહત મળવાની આશા વ્યક્ત કરવામાં આવી રહી છે.

સાઉથ વેસ્ટ ઝોન હેઠળ સરખેજ અને જોધપુર વોર્ડ વિસ્તારમાં આવેલા વિવિધ ખુલ્લા પ્લોટોને “Only Parking Purpose (For All)” હેતુસર ફાળવવામાં આવ્યા છે. કોમર્શિયલ કોમ્પલેક્ષોમાં પાર્કિંગના અભાવે આસપાસના રસ્તાઓ પર વાહનો ગેરરીતે પાર્ક થતાં હતાં, જેના કારણે ટ્રાફિક જામ અને વાહનવ્યવહારની સમસ્યાઓ સર્જાતી હતી. આ સ્થિતિને ધ્યાનમાં રાખીને AMC દ્વારા કુલ 12 કોમર્શિયલ એકમોને પાર્કિંગ માટે પ્લોટ એલોટ કરવામાં આવ્યા છે.

આ માટે મકરબા, વેજલપુર, બોડકદેવ-મકરબા-વેજલપુર અને સરખેજ વિસ્તારના વિવિધ ટી.પી. પ્લોટો ફાળવવામાં આવ્યા છે. આ ઉપરાંત YMCA ક્લબ પાછળનો વિસ્તાર, આનંદનગર રોડ, એસ.જી. હાઈવે, પ્રહલાદનગર રોડ, કોર્પોરેટ રોડ તથા કર્મ કોલેજ નજીકના વિસ્તારોમાં આવેલા પ્લોટો પાર્કિંગ માટે ઉપયોગમાં લેવામાં આવશે. AMC દ્વારા આ પ્લોટો બદલ સંબંધિત અરજદારો પાસેથી ભાડું, GST અને ડિપોઝિટની રકમ વસૂલવામાં આવી છે.

જેમાં કુલ રૂ. 41,53,500 ભાડા પેટે, રૂ. 1,04,760 GST પેટે તેમજ રૂ. 10,38,375 ડિપોઝિટ તરીકે વસૂલવામાં આવ્યા છે. આમ AMCને કુલ રૂ. 52,96,635ની આવક પ્રાપ્ત થઈ છે.

આ પાર્કિંગ પ્લોટો માટે મોટાભાગની મંજૂરીઓ એક વર્ષના સમયગાળા માટે આપવામાં આવી છે. ખાસ કરીને એસ.જી. હાઈવે, આનંદનગર, મકરબા, પ્રહલાદનગર અને સરખેજ જેવા ઝડપથી વિકસતા અને ભારે ટ્રાફિકવાળા વિસ્તારોમાં AMC દ્વારા અપનાવવામાં આવેલ આ મોડલ શહેર આયોજન અને ટ્રાફિક મેનેજમેન્ટ માટે અસરકારક સાબિત થઈ રહ્યું છે.

AMCની આ પહેલ માત્ર ટ્રાફિક નિયંત્રણ પૂરતી મર્યાદિત નથી, પરંતુ શહેરી સુવિધા વ્યવસ્થાપન અને આવક આધારિત પ્લાનિંગનું એક નવું મોડલ પણ બની રહી છે. કોમર્શિયલ કોમ્પલેક્ષો દ્વારા AMCના પ્લોટ ભાડે લઈ અલગ પાર્કિંગ સુવિધા ઉભી કરાતા આસપાસના રસ્તાઓ પર થતા ગેરવ્યવસ્થિત પાર્કિંગમાં ઘટાડો નોંધાઈ રહ્યો છે, જેના કારણે વાહનવ્યવહાર વધુ સુગમ બન્યો છે. અમદાવાદ જેવા ઝડપથી વિસ્તરતા શહેરમાં પાર્કિંગ સમસ્યાના લાંબા ગાળાના ઉકેલ માટે AMCની આ પહેલ મહત્વપૂર્ણ માનવામાં આવી રહી છે.

અમદાવાદ મ્યુનિસિપલ કોર્પોરેશન દ્વારા શહેરના અન્ય ઝોનમાં પણ વધતી પાર્કિંગ અને ટ્રાફિક સમસ્યાને ધ્યાનમાં રાખીને ખાનગી માલિકો તથા કોમર્શિયલ કોમ્પ્લેક્સોને પાર્કિંગ હેતુસર કુલ 102 પ્લોટ ફાળવવામાં આવ્યા છે.

ઝોન પ્રમાણે ઉત્તર ઝોનમાં 18, દક્ષિણ ઝોનમાં 6, પૂર્વ ઝોનમાં 21, પશ્ચિમ ઝોનમાં 12, ઉત્તર-પશ્ચિમ ઝોનમાં સૌથી વધુ 33 તથા દક્ષિણ-પાશ્ચિ ઝોનમાં 12 પ્લોટ પાર્કિંગ માટે મંજૂર કરવામાં આવ્યા છે. AMC દ્વારા શહેરના વ્યસ્ત વિસ્તારોમાં અવ્યવસ્થિત પાર્કિંગને નિયંત્રિત કરવા અને ટ્રાફિક મેનેજમેન્ટને વધુ સુવ્યવસ્થિત બનાવવા માટે આ પ્રકારની આયોજનબદ્ધ વ્યવસ્થા અમલમાં મૂકવામાં આવી રહી છે.