અમદાવાદ મ્યુનિ. અધિકારીઓએ ઓફિસ આવવા-જવા માટે શક્ય હોય ત્યાં સુધી બસનો…

અમદાવાદ મ્યુનિસિપલ કોર્પોરેશન દ્વારા ઈંધણ બચત અને જાહેર પરિવહનના ઉપયોગને પ્રોત્સાહન આપવા મહત્વપૂર્ણ નિર્ણય લેવામાં આવ્યો છે. મ્યુનિસિપલ કમિશનર દ્વારા જાહેર કરાયેલા પ્રેસનોટ મુજબ હવે AMCના અધિકારીઓ અને કર્મચારીઓને ઓફિસ આવવા-જવા માટે શક્ય હોય ત્યાં સુધી AMTS અને BRTS જેવી જાહેર બસ સેવાઓનો ઉપયોગ કરવાની સૂચના આપવામાં આવી છે.

રાષ્ટ્રીય સંપત્તિ સમાન પેટ્રોલ અને ડીઝલ જેવા ઈંધણનો ઓછામાં ઓછો ઉપયોગ થાય તે માટે તમામ ઝોન ઓફિસ સહિત વિભાગીય અધિકારીઓ અને કર્મચારીઓને સૂચનાઓ આપવામાં આવી છે. જો કોઈ કર્મચારી અથવા અધિકારી ખાનગી વાહનનો ઉપયોગ કરીને ઓફિસ આવે છે અને તે જ રૂટ પર અન્ય કર્મચારીઓ રહેતા હોય તો તેઓએ સાથે મળીને “કાર પૂલિંગ” પદ્ધતિ અપનાવવાની રહેશે. એટલે કે એક જ વાહનમાં એકથી વધુ કર્મચારીઓ મુસાફરી કરે તેવી વ્યવસ્થા ગોઠવવાની રહેશે.

AMCએ કર્મચારીઓ માટે ખાસ સૂચનાઓ પણ જાહેર કરી છે. જો અધિકારીઓને ફિલ્ડ વિઝિટ માટે જવું પડે તો તેઓએ એકબીજા સાથે સંકલન કરીને એક જ વાહનમાં જવાની વ્યવસ્થા કરવી પડશે અથવા શક્ય હોય ત્યાં સુધી જાહેર પરિવહનનો ઉપયોગ કરવો પડશે. મ્યુનિસિપલ કોર્પોરેશનનું માનવું છે કે આ પગલાથી ઈંધણ બચત ઉપરાંત શહેરમાં ટ્રાફિકનું દબાણ અને પ્રદૂષણમાં પણ ઘટાડો થઈ શકે છે.

AMTS અને BRTS હાલ મળીને દરરોજ અંદાજે 13 લાખ જેટલા મુસાફરોને સેવા આપી રહી છે. આગામી સમયમાં આ સંખ્યામાં વધુ વધારો થવાની શક્યતા વ્યક્ત કરવામાં આવી છે. AMCના અધિકારીઓના મતે સરકારી તંત્ર દ્વારા જ જાહેર પરિવહનનો વધુ ઉપયોગ કરવામાં આવશે તો સામાન્ય નાગરિકોમાં પણ સકારાત્મક સંદેશ જશે.

પર્યાવરણ અને ટ્રાફિક નિષ્ણાતોના મતે AMCની આ પહેલ માત્ર ઈંધણ બચત પૂરતી મર્યાદિત નથી. શહેરમાં વધતા વાહનો, ટ્રાફિક જામ અને વાયુ પ્રદૂષણ વચ્ચે જાહેર પરિવહનને પ્રોત્સાહન આપવાની જરૂરિયાત લાંબા સમયથી અનુભવાઈ રહી હતી. હવે મ્યુનિસિપલ તંત્ર દ્વારા જ આ દિશામાં શરૂઆત કરવામાં આવતા ભવિષ્યમાં વધુ વ્યાપક અભિયાન હાથ ધરાય તેવી શક્યતા વ્યક્ત કરવામાં આવી રહી છે.

અમદાવાદ જેવા ઝડપથી વિકસતા શહેરમાં દરરોજ હજારો લીટર ઈંધણનો વપરાશ થાય છે. ત્યારે સરકારી કર્મચારીઓ દ્વારા જ જાહેર પરિવહન અને કાર પૂલિંગ જેવી પદ્ધતિ અપનાવવામાં આવશે તો તે માત્ર ખર્ચ બચત નહીં પરંતુ પર્યાવરણ સુરક્ષા માટે પણ મહત્વપૂર્ણ પગલું સાબિત થઈ શકે છે.