(એજન્સી)અમદાવાદ, નિકોલ રોડ પર આવેલા એક ફ્લેટના ચોકીદારની રૂમમાં છૂપી રીતે ચાલી રહેલા ચરસના કાળા કારોબારનો પોલીસે પર્દાફાશ કર્યાે છે. પોલીસે સ્થળ પરથી એક નેપાળી મૂળના શખ્સની ધરપકડ કરી તેની પાસેથી ૮૩ હજારની કિંમતનું ૩૩૩ ગ્રામ ગેરકાયદેસર ચરસનો જથ્થો કબ્જે કર્યાે છે.
જ્યારે જથ્થો સપ્લાય કરનાર પલાયન થઇ જતા તેની શોધખોળ આદરી છે. એએનટીએફ ગાંધીનગરની ટીમને ચોક્કસ બાતમી મળી હતી કે નિકોલ કાનબા હોસ્પિટલથી એસ.પી. રિંગ રોડ તરફ જતા રોડ પર આવેલા ‘પોલારીસ આનંદ ફ્લેટ’ના વોચમેનના રૂમમાં ચરસનો જથ્થો છૂપાવવામાં આવ્યો છે.
બાતમી પાકી હોવાથી પોલીસે કાયદાકીય પ્રક્રિયાના ભાગરૂપે અમદાવાદ મહાનગરપાલિકાના પૂર્વ ઝોનના બે સરકારી અધિકારીઓને પંચ તરીકે સાથે રાખ્યા હતા. ત્યારબાદ પોલીસની ટીમે બાતમીવાળી જગ્યાએ ઓચિંતી રેડ પાડી દરવાજો ખખડાવ્યો હતો.
રૂમમાં હાજર ઇસમની પૂછપરછ કરતા તેનું નામ માનબહાદુર ગગન બુધા હોવાનું બહાર આવ્યું હતું. પોલીસે એનડીપીએસ એક્ટની કલમ ૫૦ મુજબ તેની સંમતિ મેળવી રૂમની સઘન જડતી શરૂ કરી હતી. રૂમમાં આવેલા એક શો-કેસના વચ્ચેના ડ્રોવરને ખોલીને તપાસતા તેમાંથી પ્લાસ્ટિકની કોથળીમાં ખાખી સેલોટેપ વીંટેલો કથ્થઈ કલરનો નરમ પદાર્થ મળી આવ્યો હતો.
ઘટનાસ્થળે એફએસએલના મહિલા અધિકારીને બોલાવી પ્રાથમિક પરીક્ષણ કરાવતા આ પદાર્થ ‘ચરસ’હોવાનું સાબિત થયું હતું. પોલીસે તોલમાપ કરાવતા ડબ્બા સાથે કુલ ૩૮૭ ગ્રામ અને નેટ ૩૩૩ ગ્રામ શુદ્ધ ચરસ હોવાનું ખૂલ્યું હતું, જેની આંતરરાષ્ટ્રીય બજાર કિંમત અંદાજે રૂ. ૮૩,૨૫૦ થાય છે.
આ સિવાય પોલીસે રૂમમાંથી ૫૦૦ની કિંમતનો એસએફ ૪૦૦ મોડલનો ડિજિટલ વજનકાંટો, રૂ. ૧૦,૦૦૦ની કિંમતનો મોબાઈલ ફોન, રૂ. ૨૩૦ની રોકડ રકમ તેમજ આધારકાર્ડ અને નેપાળી નાગરિકતા પ્રમાણપત્ર જપ્ત કર્યું છે.
