અમદાવાદ રેલવે મંડળ ડ્રોનની મદદથી ઓવરહેડ ઇક્વિપમેન્ટ પર નજર રાખી રહ્યુ છે

પશ્ચિમ રેલવેના અમદાવાદ મંડળે ઓવરહેડ ઇક્વિપમેન્ટ (ઓએચઈ) ની તપાસ માટે ડ્રોનથી હવાઈ નિરીક્ષણનું સફળ પરીક્ષણ કર્યું છે. ભારતીય રેલવેમાં નવી ટેકનોલોજી દ્વારા સુરક્ષિત જાળવણીની દિશામાં આ એક મહત્વપૂર્ણ પગલું છે.

રેલવે બોર્ડ દ્વારા એપ્રિલ 2026માં RDSO ના નિર્દેશ ક્રમાંક TI/IN/0060 ને મંજૂરી મળ્યા બાદ પશ્ચિમ રેલવે આ ટેકનોલોજીનો ઉપયોગ શરૂ કરનાર અગ્રણી ઝોનોમાં સામેલ થયું છે. 8 જૂન 2026ના રોજ કરવામાં આવેલા આ પરીક્ષણથી પરંપરાગત મેન્યુઅલ તપાસને બદલે આધુનિક અને વધુ સુરક્ષિત વ્યવસ્થાની દિશામાં આગળ વધવાનો માર્ગ ખુલ્યો છે.

ડીજીસીએના ધોરણો અનુસાર હાઈ-રિઝોલ્યુશન કેમેરા અને જિયો-ટેગિંગ સુવિધા ધરાવતા ડ્રોનની મદદથી અમદાવાદ મંડળની ટીમે માસ્ટ સંખ્યા 493-494 વચ્ચે ઓએચઈ સંરચનાઓનું નિરીક્ષણ કર્યું. નિરીક્ષણ દરમિયાન મળી આવેલી દરેક ખામીના ફોટોગ્રાફ લેવામાં આવ્યા, તેને જીપીએસ લોકેશન સાથે દાખલ કરવામાં આવ્યા અને તેની ગંભીરતાનું મૂલ્યાંકન કરવામાં આવ્યું. આથી જરૂરી મરામતના કામોને પ્રાથમિકતા આધારે હાથ ધરવા સરળ બનશે.

આ નિરીક્ષણ આરડીએસઓ દ્વારા જારી કરાયેલી નવા દિશા-નિર્દેશ (TI/IN/0060) મુજબ કરવામાં આવ્યું હતું.આ દિશા-નિર્દેશમાં ડીજીસીએ માન્યતા પ્રાપ્ત ડ્રોન, જીપીએસ/જીએનએસએસ , જિયો-ટેગ્ડ તસવીરો અને થર્મલ સ્કેનિંગ જેવી સુવિધાઓનો સમાવેશ કરવામાં આવ્યો છે.

પરીક્ષણ દરમિયાન વિવિધ પ્રકારની ખામીઓ સામે આવી હતી. તેમાં ઇન્સ્યુલેટર પર ફ્લેશ માર્ક, કેન્ટીલીવર પર લટકતી બાહ્ય સામગ્રી, પોર્ટલ સંરચનાઓ અને કેન્ટીલીવર પર પક્ષીઓના માળા તેમજ ત્યાં બેસેલા પક્ષીઓનો સમાવેશ થાય છે. ઉપરાંત, કેટનરી સ્ટ્રેન્ડમાં થયેલા નુકસાન જેવી ગંભીર ખામીઓ પણ મળી આવી, જેને સામાન્ય નિરીક્ષણ દરમિયાન ઓળખવી મુશ્કેલ હોય છે.

ડ્રોન દ્વારા લેવામાં આવેલી સ્પષ્ટ અને જિયો-ટેગ્ડ તસવીરોની મદદથી આ ખામીઓનું ચોક્કસ સ્થાન જાણી શકાયું. પરિણામે સમયસર સમારકામ કરીને ભવિષ્યમાં ઓએચઈ ટ્રિપિંગ, વીજ પુરવઠામાં વિક્ષેપ અને અન્ય કામગીરી સંબંધિત સમસ્યાઓને અટકાવી શકાય છે.