પાકિસ્તાનના ગેરકાયદેસર કબજા હેઠળના જમ્મુ અને કાશ્મીર (PoK)માં રાજકીય સંકટ વધુ ઘેરી બન્યું છે. 27મી જુલાઈએ યોજાનારી વિધાનસભાની ચૂંટણી પૂર્વે સમગ્ર વિસ્તાર આગની લપેટમાં છે. મૂળભૂત અધિકારો અને આર્થિક માંગણીઓ સાથે શરૂ થયેલી ‘જોઈન્ટ અવામી એક્શન કમિટી’ (JAAC) નું જન આંદોલન હવે ‘સ્વ-શાસન’ અને રાજકીય અધિકારો માટેના મોટા યુદ્ધમાં ફેરવાઈ ગયું છે.
આ ચળવળને કચડી નાખવા માટે, પાકિસ્તાન સરકારે JAAC પર સંપૂર્ણ પ્રતિબંધ લગાવી દીધો છે, ઇન્ટરનેટ બંધ છે અને દરેક ખૂણે ભારે સૈન્ય તૈનાત કરવામાં આવ્યું છે. જેના વિરોધમાં આંદોલનકારીઓએ 27મી જુલાઈની ચૂંટણીનો સંપૂર્ણ બહિષ્કાર કરવાની જાહેરાત કરી છે.
લોટ અને વીજળી માટેની લડાઈથી લઈને રાજકીય અધિકારો સુધી
આ સમગ્ર વિવાદ વર્ષ 2023માં શરૂ થયો હતો, જ્યારે પીઓકેના સામાન્ય લોકો વીજળીના મોટા બિલો, લોટની વધતી કિંમતો અને અન્ય આર્થિક સમસ્યાઓ સામે રસ્તા પર ઉતરી આવ્યા હતા. ધીમે ધીમે આ ગ્રાસરુટ આંદોલને મોટું સ્વરૂપ લીધું અને 38 મુદ્દાનો માંગ પત્ર તૈયાર કરવામાં આવ્યો.
આ આંદોલનની સૌથી મોટી માંગ પીઓકે એસેમ્બલીમાં પાકિસ્તાન દ્વારા બળજબરીથી રાખવામાં આવેલી 12 આરક્ષિત શરણાર્થીઓની બેઠકોને નાબૂદ કરવાની છે. આંદોલનકારીઓનો આરોપ છે કે પાકિસ્તાન આ બેઠકો દ્વારા ચૂંટણીમાં છેડછાડ કરે છે. જો કે ઓક્ટોબર 2025માં સરકાર અને JAAC વચ્ચે સમજૂતી થઈ હતી, સમિતિએ આરોપ લગાવ્યો છે કે સરકારે વચનોથી સંપૂર્ણપણે પાછીપાની કરી છે.
