એશિયાના દક્ષિણ-પૂર્વીય દેશ ઈન્ડોનેશિયામાં શનિવારે સવારે ભૂકંપના આંચકા અનુભવાયા હતા. ઈન્ડોનેશિયાના ફ્લોરેસ વિસ્તારમાં 7.7ની તીવ્રતાનો શક્તિશાળી ભૂકંપ આવ્યો હતો. આ શક્તિશાળી ભૂકંપ બાદ સુનામીની ચેતવણી જારી કરવામાં આવી છે. જો કે હાલ આ ઘટનામાં કોઈ જાનહાની થઈ નથી.
યુએસ જીઓલોજિકલ સર્વે (યુએસજીએસ) અનુસાર, ભૂકંપ ઈન્ડોનેશિયાના સમય અનુસાર સવારે 5:58 કલાકે આવ્યો હતો. તેનું કેન્દ્ર પૂર્વ નુસા તેન્ગારા પ્રાંતના એન્ડે શહેરથી 68 કિલોમીટર દૂર હતું. ભૂકંપ સમુદ્રની નીચે 10 કિલોમીટરની ઉંડાઈએ આવ્યો હતો. મળતી માહિતી મુજબ 7.7ની તીવ્રતાના ભૂકંપ બાદ 2 આફ્ટરશોક પણ નોંધાયા છે.
સુનામી એલર્ટ જારી
ઈન્ડોનેશિયાની ‘મેટિરોલોજી, ક્લાઈમેટોલોજી એન્ડ જિયોફિઝિક્સ એજન્સી’એ ભૂકંપ બાદ સુનામીની ચેતવણી જારી કરી છે. એજન્સીએ લોકોને બીચ અને નદી કિનારાથી દૂર રહેવાની અપીલ કરી છે. દરિયાકાંઠાના વિસ્તારોમાં રહેતા લોકોને તાત્કાલિક સુરક્ષિત અને ઊંચા સ્થળોએ ખસી જવાની સલાહ આપવામાં આવી છે. અધિકારીઓ દરિયાની સપાટીમાં થતા કોઈપણ ફેરફારો પર નજીકથી નજર રાખી રહ્યા છે.
