દક્ષિણ આફ્રિકા સામેની બીજી ટેસ્ટની પ્રથમ ઇનિંગમાં ભારતીય બેટ્સમેનોએ ખૂબ જ નિરાશ કર્યા હતા. 489 રનના જવાબમાં ભારતીય ટીમ 201 રનમાં સમેટાઈ ગઈ હતી. સોમવારે ભારતનો સ્કોર એક સમયે એક વિકેટે 95 રન હતો પરંતુ તેણે 27 રનની અંદર છ વિકેટ ગુમાવી દીધી હતી. મુશ્કેલ સમયમાં રિસ્ટ સ્પિનર કુલદીપ યાદવે સ્થિર બેટિંગ કરી હતી. તેણે વોશિંગ્ટન સુંદર (48) સાથે આઠમી વિકેટ માટે 72 રનની ભાગીદારી કરી હતી. જોકે, 30 વર્ષીય કુલદીપ વધુ રન બનાવી શક્યો નહોતો. તેણે 134 બોલમાં ત્રણ ચોગ્ગાની મદદથી 19 રન બનાવ્યા હતા. તેના નામે એક આશ્ચર્યજનક રેકોર્ડ નોંધાયો છે.
આ મામલે કુલદીપ નંબર-1 બન્યો હતો
કુલદીપનો 19 રનની ઈનિંગમાં 14.18નો સ્ટ્રાઈક રેટ હતો. ઘરેલું ટેસ્ટ ઇનિંગ્સમાં ઓછામાં ઓછા 100 બોલ રમ્યા બાદ ભારતીય ક્રિકેટરનો આ સૌથી ઓછો સ્ટ્રાઇક રેટ છે. તેણે રાહુલ દ્રવિડ અને સચિન તેંડુલકરના રેકોર્ડ તોડી નાખ્યા છે. ભૂતપૂર્વ દિગ્ગજ દ્રવિડે ઑક્ટોબર 2004માં ઑસ્ટ્રેલિયા સામે નાગપુરમાં રમાયેલી ટેસ્ટની પ્રથમ ઇનિંગમાં 140 બોલમાં 21 રન બનાવ્યા હતા, જેમાં બે ચોગ્ગા સામેલ હતા. દ્રવિડનો સ્ટ્રાઈક રેટ 15.00 હતો. તે જ સમયે, મહાન બેટ્સમેન સચિને ડિસેમ્બર 2005માં ચેન્નાઈમાં શ્રીલંકા સામેની ટેસ્ટની પ્રથમ ઈનિંગમાં 126 બોલમાં 22 રન ઉમેર્યા હતા. ત્યારે સચિનનો સ્ટ્રાઈક રેટ 17.46 હતો.
ગુવાહાટીમાં ટીમ ઈન્ડિયા બેકફૂટ પર
સોમવારે મેચના ત્રીજા દિવસે ટીમ ઈન્ડિયા બેકફૂટ પર રહી હતી. દક્ષિણ આફ્રિકાએ યજમાન ટીમને ફોલોઓન ન કરવાનો નિર્ણય લીધો હતો. 288 રનની લીડ મેળવ્યા બાદ સાઉથ આફ્રિકાએ બીજા દાવમાં સ્ટમ્પ સુધી કોઈ વિકેટ ગુમાવ્યા વિના 26 રન બનાવ્યા હતા. દક્ષિણ આફ્રિકાની કુલ લીડ 314 રનની થઈ ગઈ છે. દિવસની રમતના અંતે રેયાન રિકલ્ટન 13 રને અણનમ હતો જ્યારે એડન માર્કરામ 12 રને અણનમ હતો. ભારત તરફથી ઓપનિંગ બેટ્સમેન યશસ્વી જયસ્વાલે (58) સૌથી વધુ રન બનાવ્યા હતા. દક્ષિણ આફ્રિકા માટે ઝડપી બોલિંગ ઓલરાઉન્ડર માર્કો જાનસેને 48 રનમાં છ વિકેટ ઝડપી હતી. કુલદીપ પણ યાનસેનનો શિકાર બન્યો હતો.
